Projek ‘gajah belang’ RMM di Permy 3 di Kuala Baram ukai enggi SPNB
MIRI: Syarikat Perumahan Negara Berhad (SPNB) madahka sida iya ukai gerempung ke mangku tanggungpengawa ba pengelaun projek ke diserumba ‘gajah belang’ (projek ke enda ulih tembu tauka ditinggalka), baka ke bisi di ripot ba siti surat berita jaku Melayu, kemari.
Ketuai Pegawai Komunikasi SPNB ( Sarawak), Wan Habeeb Alli Mohdzar madah surat berita nasional nya madahka projek ‘gajah belang’ Rumah Mampu Milik (RMM) di Permy 3, Kuala Baram nya baruh kuasa SPNB lalu sida ke meli rumah dia, lalu bedau meda 241 unit RMM nya didirika, ari taun projek nya dilancharka tiga taun tu ke udah.
Wan Habeeb ba siti penerang madahka, projek nya baruh kuasa Housing Development Corporation (HDC) lalu berita ke madahka SPNB nya, berita ke salah.
“Kami deka nerangka, iya nya RMM Permy 3 Kuala Baram ukai tanggungpengawa kami, lalu kami ngarapka mensia mayuh terang pasal pekara tu, laban dawa ke madahka SPNB nya semina ngenyaika nama kami, enti pekara tu enda diterangka,” ku iya.
“Enggi kami empu, iya nya projek RMM Fasa 1 bisi 963 unit ba Vista Perdana (VP) Miri udah tembu digaga lalu udah abis dijual, sereta udah diserah ngagai orang ke meli dalam taun 2010, lalu ke 789 unit fasa ke-2, ti dilancharka kena bulan Julai 2016, udah 98 peratus dijual lalu dipelabaka tembu dalam bulan Ogos tu, ke besereta enggau pemendar ulih opis kandang menua,” ku iya lalu nandu baru madah rumah nya dijual enggau rega baruh ari penyampau RM300,000.
Ku Wan Habeeb baru, SPNB mega bisi ngaga kaul kerejasama enggau Perintah Menua bisi meri rumah sukut seringkat ti udah chukup disediaka enggau perengka guna bukai ngagai ‘Raja Pecut Negara’ Watson Nyambek, alai ( lebuh nya) pengawa nyuaka kuchi rumah digaga ba mua ex-Kepala Menteri, niang Pehin Sri Adenan Satem dalam bulan Oktober, 2016.
“Rumah ke bisi tiga buah bilik nya sebagi ari 789 unit, ti digaga di SPNB Aspirasi’s Vista Perdana (fasa 2) ulioh kuntriktor besai kami, Naim Group of Companies, lalu rumah nya diberi pechuma ngagai Watson laban ngenang budi iya ke udah ngangkatka nama Malaysia ba pengawa lumba enggau main, alai pengawa tu mega dipuji ulih niang Tok Nan,” ku iya.