Projek tu deka digaga semanjai Sungai Miri dikena nentuka tikas pemeresi sungai di kandang menua nya: Adam

MIRI: Majlis Bandaraya Miri (MBM) enggau kerejasama Kaunsil Sungaisungai Sarawak ( LSS) Bagi Menua Miri, kemari ngelala beberapa endur ti diasaika patut ngaga perangkap uras di semanjai Sungai Miri, ba pengawa meresi sungai nya ari uras.

Dipejalai di baruh komiti ti ditumbuh khas, iya nya Raban Gawaka Pemeresi Sungai, datai ari raban LSS; MBM ( ngaul Komiti LA21; Opis Injinir; Pengawa Ngintu enggau Pengerai Mensia Mayuh sereta Opis Ngintu Pemeresi Mensia Mayuh); Opis Kunsil Pengeraja Asal enggau Rampa Menua ( NREB), Opis Rampa Menua ( JAS) sereta Opis Parit enggau Entali Ai ( JPS).

Diketuaika empu Datuk Bandar, Adam Yii enggau pemesai ari tetiap ejensi bekaul nyengkaum pemesai ari Opis Tanah enggau Survei ( JTS); raban nya deka bejalai gawa di semanjai Sungai Miri, berengkah ari Jelatung Piasau Utara ditu, penyauh beberapa kilometer ngambika ngelala endur ti patut.

“Endur ti dikelala ngambika dilekat perangkap uras tu ila deka dikerandau silik ari ari Raban Bejalaika Pengawa Pemeresi Sungai sebedau tu diserah ngagai raban JTS ngambika dikemendar ( ngambi ngaga projek nya),” ku iya madah ngagai Utusan Borneo ditu, kilah ensana.

Ku Adam, semina enti endur ungkup projek tu patut digaga sereta dikemendarka JTS baru raban sida deka ngepunka pengawa udah nya sereta madahka berapa endur ti patut sereta dikemendar endur ngaga perangkap uras nya.

Ku iya, program pemeresi sungai dipejalai di baruh komiti gawa nya dikearap ulih mantu pengawa meresi enggau ngurangka uras ti anyut di Sungai Miri lalu anyut ngagai tasik sereta ngamahka tebing tasik ditu.

“Pejalai kitai nengah Sungai Miri pagi tadi dikena ngelala endur ti patut endur nirika perangkap uras ngambi ngurangka pangka iya ngagai rampa menua sereta indeks pemeresi Sungai Miri,” ku iya enggau nadai madahka ungkus tetiap projek perangkap uras nya, dataika iya dikemendar ila.

Berebak enggau nya, iya mega meransang mensia mayuh ngambika ngembuan ulah bisi tanggungpengawa agi enggau enda muai uras ngagai sungai dikena nyeliahka Sungai Miri kamah enggau tugung uras ti anyut, kelimpah ari ngamahka kandang tebing tasik mega.

NGINTU PENGERAMI BEGULAI: Moss (tiga kanan) begulai enggau ke bukai begambar ungkup kenang lebuh pengerami nya, kilah ensana.

GAWA: Adam (tengah) begulai enggau pemesai ari ejensi bekaul enggau Raban Ngatur Pengawa Pemeresi Sungai Miri, ti bekaul bejalaika pengawa matau di sepanjai Sungai Miri, kemari.

NGELALA NI BAGI KE PATUT: Raban gawa ti ditumbuh khas meratika Sungai Miri ngiga endur ti patut ngaga projek perangkap uras.