Pengajar dilalau naka ulih ngena perengkaguna teknologi ke udah bisi
MIRI: Bala pengajar nadai agi relevan semina bekenaka buku teks enggau papan tulis lebuh pengawa ngajar enggau belajar (PDP) ba kelas tang patut ngubah PDP seriris enggau pemansang teknologi kemaya hari.
Ketuai Pemesai Opis Pelajar Pelilih (PPD) Miri Sharini Mastur Mohamed Zulkifli madahka bala pengajar patut ngena enggau naka ulih perengkaguna ke udah bisi baka internet sereta teknologi komputer dalam tanggungpengawa meri penemu.
Kelimpah ari nya, pengawa ngajar enggau belajar bala pengajar mega meseti ulih meri empas ti positif ari sukut tikas ulih-terima nembiak sekula sereta chara ngena penemu nya enggau engkeman.
“Ubah dunya kemaya hari tu udah mandangka akses sentang penemu kebendar nya ulih dijapai enggau lengkas nengah teknologi penerang sereta komunikasyen ti majak laju diatu,” ku iya.
Teks jaku nya udah dibacha Sapit Pengatur Kokurikulum PPD Miri Zahirul Jazmi lebuh Pekit Pidato Pengajar Sekula Primari enggau Sekondari Renggat Miri kemari.
Sharini madahka proses pelajar ba dalam kelas endang nekanka pengelandik berunding ba tikas ke tinggi ungkup sida nembiak sekula.
“Aku nemu Opis Menteri empu udah mekuh ngagai konsep chara belajar abad ke21 ke endang ngerindangka nembiak lalu meri empas ke besai ari sukut asil nya,” ku iya madah.
Sharini mega muji pemerani bala pengajar udah nyambut peminta nyereta pekit nya laban ukai nyamai ungkup sida pesereta bejaku ba mua bala mayuh enti nadai bebekalka penemu enggau pemerani diri ti tinggi.
Ba pekit nya, Mardianto Hamid ari Kolej Tunku Haji Bujang udah nyadi champion kategori Jaku Melayu lalu Nurshafinaz Mothardzar ari Sekula Sekondari ( SMK) Lutong ba penuduk lumur dua.
Ba penuduk lumur tiga udah dipenggi Jordan Maria ari SMK Chung hua lalu Ibrahim Hermanto Jepon ( SMK Baru) ba penuduk lumur empat.
Ungkup kategori Jaku English, Elaine Rani Chiam (SMK Lutong) udah megai gelar champion lalu ba penuduk lumur dua enggau lumur tiga diempu Tan Soo Kang (SMK Pujut) enggau Marcel Roma Janting (SMK Baru).
Sama bisi datai iya nya Sapit Kanan Pengatur Henry Jaini, Sapit Kanan Pom 6 Hii Yew Ding, Sapit Kanan Pekara Bekaul Nembiak Amanda Chong Lee Ngo lalu Sapit Kanan Kokurikulum Siti Akmaliah Mohd Amin.
Ubah dunya kemaya hari tu udah mandangka akses sentang penemu kebendar nya ulih dijapai enggau lengkas nengah teknologi penerang sereta komunikasyen ti majak laju diatu. Sharini Mastur Mohamed Zulkifli Ketuai Pemesai PPD Miri