‘Malaysia Baru’ patut lebih manah ari ngelama tu
KUALA LUMPUR: Malaysia Baru, lambang ke diatu mayuh dikena ngayanka perintah Pakatan Harapan ti baru pengudah pengawa bepilih besai 9 Mei patut ‘tentu manah agi’ ari atur pengawa sebedau tu ti megai menua, pia ku Menteri Besai Tun Dr Mahathir Mohamad.
“Tambah mega, Malaysia Baharu iya nya ubah ti manah agi ngagai timpuh sepanjai aku nyadi menteri besai pengelama 22 taun,” ku iya dalam randau enggau Investvine, portal berita dagang bepalan di Hong Kong ti naburka berita khas agi di Asia Tenggara, belalauka timpuh keterubah iya nyadi menteri besai nyentuk November 2003.
Dr Mahathir madah Malaysia Baru ngemai reti perintah deka pulai baru ngagai demokrasyen enggau kedaulatan undang-undang sereta bebasaka peminta rayat.
“Sida udah ngayanka diri enda setujuka perintah sebedau tu, lalu tentu mega kitai patut bejalaika pengawa ngemetul dikena mai menua tu pulai baru ngagai gempung ke dulu. Dulu suba, bala staf perintah, ambika chunto, nadai ngaul diri dalam politik, tang penatai sida iya nya bejalaika polisi enggau atur pengawa perintah sereta ukai nyadi kaban politik.
“Taja pia, nyauka nyenggala amat dalam timpuh 10 taun tauka kandang timpuh nya, bala staf perintah mayuh berubah enggau sida dipeda terang bekimpinka perintah lalu pengawa tu salah. Tu ngasuh sida bechiping lalu sida bebendar nentuka perintah sebedau tu menang (bepilih), bisi maya sida ngereja pengawa ti salah,” ku iya.
Ba randau enggau Direktor Investvine Imran Saddique enggau koresponden iya Firoz Abdul Hamid, menteri besai mega bisi ngelansa pasal makai suap dalam servis perintah.
“Bala sida beratika pengawa beambi ulih ungkup diri empu lalu nadai berasai sanggu tunduk ngagai penyalah nya. Meda bala ketuai perintah empu dituduh makai suap, kami beratika mayuh ari sida ngereja penyalah makai suap lalu tentu mega kami enda ulih nejuka sida tu pia aja laban nitihka peragam, etika sida ba pekara nya ukai pekara ti dikearap ari pekereja perintah,” ku iya.
Dr Mahathir nyemetak madahka perintah baru enda malas dendam enggau pengawa ningkilka sida laban pengudah individu tauka pemesai baka nya ngaul diri ngereja penyalah, endang salah perintah terus ngambi sida gawa.
“Sida ti beresi, deka ditan. Bisi maya mar amat nyilih pemesai ke bisi diatu laban di baruh sida mega bisi pemesai makai suap. Bisi maya kami patut nyingkang tiga tauka empat singkang ke baruh sebedau kami ulih betemu enggau pemesai ti nadai ngaul diri.
“Nya kebuah atur pejalai deka begunaka timpuh laban nadai pemesai tauka ketuai perintah ti beresi, kami enda deka ulih ngemaru enggau negika kedaulatan undangundang,” ku Dr Mahathir.
Iya mega madahka perintah benung muai ‘agak banyak orang’ laban sida ngaul diri lalu ukai ketegal kaul sida nyadi kaban parti tang ba kes ti sida terang mantaika diri bekimpinka parti megai perintah sebedau tu.
“Kami enda ulih melabaka sida bejalaika pangku pengawa diri enggau nadai dikeruga ari penaluk sida. Ari nya, tu mih batang penanggul iya, nya kebuah keterubah iya kami patut bepegai ba kedaulatan undang-undang lalu sekali agi bekenaka sistem ngatur pengawa demokratik,” ku iya.
Ditanya baka ni iya ngelanggur dikena ngubah budaya nya dalam servis perintah, ku menteri besai, tu deka begunaka timpuh laban kesemua sistem nilai rayat udah diremehkan kelebih agi di baruh perintah sebedau tu.
Menteri besai mega madah pasal perintah sebedau tu ti rindu meri duit ngagai rayat ti nyata ketegal penyeranta tang sida ti ukai seranta mega bisi nyadi penerima iya.
“Pia mega, tetiap iku diberi wang pia aja ari perintah. Tu ngasuh rayat bepanggai ngagai perintah lalu sida badu agi bekereja ngulihka belanja. Sida melabaka penatai pemisi sida datai ari peribtah ti udah rusak etika kereja sida dataika ngagai tikas sida badu agi bekereja ngulihka belanja dikena idup.
“Sida bepenemu taja sida enda bekereja, perintah bisi tanggungjawab melanja sida, lalu tu tentu mega enda pulaika pemanah laban tu reti iya sida enda produktif,” ku iya.
Ku Dr Mahathir, enti pekara tu majak nyadi, tentu penyampau tubuh sida ti produktif deka kurang lalu sida enda tebayarka chukai ti diguna perintah dikena nampung ‘chara ngatur pengawa chukup kaya tu,” ti meri pemeri pia aja ngagai rayat.
“Nya alai kami patut ngubah iya lalu tentu deka bisi pangka iya,” ku iya.
Iya meri chunto wang diberi ngagai raban berikan ti dibayar ninting bulan sekalika sida berikan tauka enda lalu tu pekara ti enda ulih dipelanja perintah laban wang nya diambi ari perintah tauka ari pemansut belalai baka 1Malaysia Development Bhd (1MDB).
“Baka wang ari 1MDB ti diambi perintah lalu diberi ngagai rayat. Kami enda ulih ngereja pengawa baka nya laban kami nadai wang. Tang enti kami madah ngagai rayat ke alai ‘minta ampun kami enda ulih meri ngagai kita baka ti udah suah diterima kita’, tu enda deka diterima laban sida deka madah ‘perintah sebedau tu manah agi’. Tang kami patut madah memanah ke alai kami enda ulih meri sida wang kelimpah ari sida bekereja ngiga belanja,” ku iya.
Ditanya sekalika kesemua prestasyen sistem atur pengawa dalam Opis Servis Perintah patut diserenih baru nyadi sebagi ari pengawa ngubah budaya nya, ku Dr Mahathir, iya berati ngagai peminta dikena nikika pangkat orang gawa perintah biak agi dikena nyilih sida ti udah ‘luyar’.
“Nyangka sida tu kurang peneleba tang enti diberi latih, sida deka nyadi raban baru ti nadai kamah enggau ulah enda manah dulu suba,” ku iya. — Bernama