Penanggul bekal ai suah ditapi di Engkilili/Skrang deka teputar

KUCHING: Penanggul suntuk enggau pungkang bekal ai ke suah ditapi peranak di sitak Engkilili/Skrang deka teputar.

Menteri Muda Bekal Ai Datuk Liwan Ladang madah, perintah merambu Projek Bekal Ai Menua Pesisir (BALB) Sitak Lubok Antu Fasa Kedua, Bagi Menua Sri Aman dikena mutar penanggul nya.

“Projek tu diati ba renggat langkar enggau dipelaba 212 pintu bilik ba sitak Kunsil Nengeri (DUN) Engkilili deka ulih ngasaika bekal ai beresi ari projek nya,” ku iya.

Iya madah munyi nya rambau nyaut tanya ari Kaban Kunsil Nengeri (ADUN) Engkilili Johnichal Rayong Ngipa bekaul pekara nya rambau Aum DUN ditu kemari.

Ditanya penyampau ungkus projek nya, Liwan madah Projek BALB Sitak Lubok Antu Fasa Kedua, Bagi Menua Sri Aman tu dipelabaka beungkus RM121 juta.

“Skop projek tu mungkur pengawa nambahka penyampau loji ai beresi, pengawa ngaga jalai paip, tekat enggau sistem,” ku iya.

Berebak enggau nya, nyaut tanya ADUN Kedup Martin Ben bekaul peratus bejalaika projek bekal ai beresi ba sepanjai Jalai Mongkos eng- gau Jalai Mentung Merau, iya madah, projek nya diatu ba renggat digaga.

“Ungkup penemu YB Kedup, projek bekal ai menua pesisir ba sitak Mentong Merau/Mongkos diatu nitihka timpuh ke diletak iya nya pemansang fizikal urung 16 peratus.

“Pengawa- pengawa ke benung dipejalai ba taba endang pengawa nyungkur tanag enggau ngadu dua tangki sereta stesyen pam pengumpa enggau dikena nyambung paip,” ku iya.

Tambah mega, iya madah projek nya dipejalai nengah Opis Menteri Pemansang Menua Pesisir enggau Kandang Menua (KKLW).