Pemansang ba mengeri Kuching majak ngerembai lalu penyampau rayat nguan mengeri tu mega nyau majak nambah
NERANG: KUCHING: Menteri Besai Tun Dr. Mahathir Mohamad temegah enggau pemansang ke udah ditempa Nengeri Sarawak.
Ku iya, Mengeri Kuching majak besai lalu penyampau rayat mega nyau majak mayuh.
“Aku udah lama enda datai ke Kuching. Ke penudi suba aku datai maya malam hari.
“Diatu aku datai maya hari tawas lalu peda aku ba Mengeri Kuching rayat udah majak mayuh, entukar pan mayuh.
“Tu mandangka pemansang ke udah mujur ditempa ba Sarawak,”ku iya lebuh dikerandau pemberita di Begunan Wisma Bapa Malaysia kemari.
Dulu agi ari nya, iya bisi mendingka licha sentang pemansang Sarawak ke diberi Sekretari Perintah Nengeri Tan Sri Mohd Morshidi Abdul Ghani pengelama sejam berengkah 8 pagi.
Ari licha nya, Dr. Mahathir pechaya Sarawak ulih matak mayuh agi pemeranak puku ari luar ba pengawa industri.
Iya netapka Sarawak bisi aset ke berega iya nya sungai enggau tanah, lalu kededua aset tu meseti dikena enggau manah.
“Industri ditu udah matak mayuh pemeranak puku ari menua luar.
“Aku pechaya puku ari menua luar ulih ditambahka agi lalu aset di Sarawak tu meseti dikena enggau manah.
“Aset Sarawak iya nya sungai, lalu nengeri tu bisi tanah ke besai enti dibandingka enggau penyampau rayat ditu,”ku iya.
Ku iya nambah, atur ngemansang tanah ditu beambi kira enggau pemaik rampa menua lalu sungai ulih dikena ba mayuh bengkah pengawa.
“Sungai ulih nyendia atur pengangkut ditu sereta ulih mega nyendiaka kuasa enggau pekara bukai.
“Ari licha nya, aku ngasai Sarawak bisi potensyel lalu semua nya bepanggai enggau chara ngena aset,”ku iya.
Dr. Mahathir mega madah kaul entara Perintah Sarawak enggau Perintah Besai diatu manah.
Iya mulaika diri ke Kuala Lumpur urung jam 10 pagi kemari pengudah nemuai 2 hari ke Kuching.
Bela ngulu licha Kepala Menteri Datuk Patinggi Abang Johari Tun Openg, Sapit Kepala Menteri Datuk Amar Douglas Uggah sereta menteri kabinet ke bukai.
Tu mandangka pemansang ke udah mujur ditempa ba Sarawak. Tun Dr. Mahathir Mohamad Menteri Besai Malaysia