Sungai di S’wak patut dikena enggau manah
KUCHING: Menteri Besai Tun Dr Mahathir Mohamad dekaka keresa di Sarawak kelebih agi baka sungai dikena memanah pulaika pemaik.
“Aku udah berandauka pengulih di Sarawak tu, kitai patut eksploitasyen aset ti dikemisi kitai iya nya sungai ti endang nyadi siti aset kelimpah ari tanah. Dandang tanah chukup besai di Sarawak dibida enggau penyampau tubuh peranak.
“Enti dibida enggau sungai, pemansang tanah diatu bepanggai ba runding ari sukut rampa menua tang enggau sungai, kitai tau ngereja mayuh pekara, pengangkut, mansutka kuasa.
Belalauka penerang ti dikenatai ngagai aku tadi (kemari), aku tetemuka pengulih ungkup pengerembai Sarawak nya bisi lalu semua tu bepanggai ngagai baka ni kitai ngena aset tu memanah,” ku iya.
Dr Mahathir mansutka jaku tu ngagai pengarang berita pengudah ngulu penerang tetutup urung 45 minit bekaul enggau pemansang Sarawak di Wisma Bapa Malaysia, Petra Jaya ditu kemari, ti dikenataika Sekretari Perintah Sarawak Tan Sri Mohamad Morshidi Abdul Ghani.
Sama bisi datai Kepala Menteri Datuk Patinggi Abang Johari Tun Openg, Sapit Kepala Menteri Datuk Amar Douglas Uggah Embas enggau rintai menteri Kabinet Sarawak.
Pengudah pengawa meri penerang tembu, Dr Mahathir dirami perintah Sarawak enggau pengawa melah kek beserimbai enggau ngintu hari pengada iya.
Ngelansa silik pasal penerang nya, ku Dr Mahathir, iya bisi dipadah, antara pekara nya bekaul enggau pemeranak puku menua luar di Sarawak.
“Ari penerang tadi, aku beratika pemansang nadai tatak ngagai Kuching aja tang mega ngagai menua bukai enggau industri mega, udah mayuh pemeranak puku menua luar datai kitu lalu aku andal tu tau ditambahka agi,” ku iya. s
Ba lansa bukai, lebuhka ditanya pasal kaul perintah besai enggau Sarawak, ku Dr Mahathir kerejasama antara kededua perintah manah.
“Diatu kitai udah berandau beberapa kali lalu kitai beratika kerejasama antara perintah Sarawak enggau Perintah Besai endang meruan,” ku iya. — Bernama KUCHING: Siti program 722 beserimbai enggau ngintu Hari Sarawak Merdeka ti keenam kali diatur kenyau ari taun 2013 di Balai Suarah Kuching kena 22 Julai tu.
Nitih ku penerang berita kemari, program tu diatur gempung ukai dikuasa perintah (NGO) begulai enggau raban bejalaika pengawa sivil nyengkaum Kongres Kebangsaan Dayak (DNC), Persatuan Aspirasi Rakyat Sarawak (SAPA), Saya Anak Sarawak (SAS) enggau Institut Kebangsaan Dayak (DANI).
Taun tu, raban komiti pengatur deka ngemeratka pekara baka jampat angkunka Sempekat Malaysia 1963, nulak Akta Pembangunan Petroleum 1974 enggau Akta Laut Wilayah 2012 di Aum Kunsil Nengeri sereta ngaku hak tanah Adat Bansa Asal (NCR) nyengkaum Pemakai Menoa enggau Pulau Galau.
Kelimpah ari nya, raban komiti pengatur merambu ngaul semak peranak menua pesisir ari Siniawan enggau Bau nyadi palan ditapat raban nya nentuka peranak di kandang menua begulai ngintu Hari Kemerdekaan Sarawak.
Batang tuju atur program dikena nempa penyedar sereta meri penemu factual pasal sejarah Sarawak ngagai mensia mayuh.
Atur program deka berengkah enggau gempuru di Balai Suarah Kuching urung pukul 10 pagi, 22 Julai tu dientudika atur aktiviti konvoi ngagai Padang Merdeka lalu udah nya nuju Siniawan enggau Bau.
Raban pengatur mega deka ngetu enda lama di Tasik Biru, bau urung pukul 1 lemai ke alai peranak dia deka ngepunka pengawa senam aerobik, poco-poco enggau zumba.
Antara program bukai bela deka diatur nyerumba pengawa ngintu Hari Kemerdekaan Sarawak iya nya ‘auto show’ enggau ‘bike show’ sereta kimpin meri darah.