Gerempung Peranak Ulu Machan ningkah dawa ti dipansutka Allan

SIBU: Nadai sebarang aktiviti nebang kayu Engkabang tauka kayu ramu belalai di kandang menua Ulu Machan.

Gerempung Peranak Ulu Machan, Kanowit ningkah dawa Kaban Kunsil Nengeri ( ADUN) Machan, Allan Siden Gramong ti madahka pengawa ngereja kayu belalai di sitak Ulu Machan dikereja sida ti gawa negika hak tanah Adat Bansa Asal (NCR).

Chairman iya, Semawi Paong madahka dawa Allan nengah penerang ti dikeluar ba surat berita Jaku English (Borneo Post) kena 12 Julai enggau pala berita ‘ Land rights defenders behind illegal timber felling, alleges Machan rep’, endang nadai pengamat.

“Kebuah pia peranak Ulu Machan ukai semina nyaga kayu Engkabang tauka kayu bukai di Ulu Machan aja, tang sida seruran gawa negika tanah NCR ngelama tu,” ku iya lebuhka dirandau pengarang berita di Sibu kemari.

Semawi mega nyakap Allan jampat ngaga ripot polis lalu madah sapa bagi orang ti ngereja ( protector and defenders of native rights land) ti disebut iya dalam penerang nya.

“Peranak Ulu Machan nyakal sebarang aktiviti ngereja kayu belalai tauka ngereja tanah NCR ukai semina di Ulu Machan aja tang mega di serata bumi Kenyalang.

“Tau nyata dipeda, peranak Ulu Machan udah mujur mai serikat batang tauka serikat ladang ti ngachau sitak Ulu Macham ngagai kort baka ti dalam kes Tuai Rumah Sandah enggau tujuh iku ke bikai ti udah nyadi ‘Landmark case’ ngagai kes tanah NCR di Sarawak,” ku iya.

Serakup Peranak Ulu Machan, Kanowit ngarika empat buah rumah panjai di Ulu Machan iya nya Rumah Lajang, Rumah Sandah, Rumah Engkayau enggau Rumah Sumbang.

Ku Semawi, penemu ke sama mega dibantaika beberapa pengari peranak ari Nanga Segerenis, Machan Kanan, Nanga Tiga enggau Machan Tengah iya nya ari keempat buah rumah panjai di Ulu Macham ti bela nulak dawa nadai pengamat ari pengari rayat nya.

“Nyadi pengari rayat di DUN Machan, Allan patut bejalai gawa ngagai pun menua lalu mansik silik lalu anang sepeneka nuduh dikena ngelaburka pengelemi tauka pemuntan iya enggau apai iya (Datuk Gramong Juna) ti kala nyadi ADUN pengelama 38 taun di Machan ngambi ngemansangka sitak Ulu Machan.

“Iya semina bisi datai maya kimpin bepilih aja,” ku iya.

Ku Semawi, peranak Ulu Machan mega pechaya dawa nya sengaja ditempa dikena nutup pemuntan ngaga jalai alun ari Nanga Machan ngaga Ulu Machan.

“Projek nya udah tejanggal taja udah tiga kali pengawa nasih tanah dipejalai sebedau tu dalam taun 2010 sebedau pengawa bepilih, 2013 enggau Ogos 2014,” ku iya nerang.

Nya alai peranak merambu ngambika raban bekuasa mansik jampat projek tejanggal nya laban iya ngaul wang rayat sereta mega pemerat peminta rayat.

Ba rikot, ku Semawi, Ulu Machan nyadi semina siti sitak aja di Macham ti dikelaung ari sebarang pemansang nyengkaum diteju ari ngasaika perengka guna pemun baka jalai alun, bekal kuasa karan enggau ai ketegal peranak Ulu Machan dikumbai nyukung penyakal ngelama tu.

“Nyentuk sehari tu, peranak pulai mansang ngena perau panjai ari rumah panjai sida tauka ngaga pasar Macham, pengelama sehari nyentuk pejalai lalu nelan belanja manggai RM300 bebelika minyak injin sepit,” ku iya.