Aplikasyen Sarawak Pay udah berengkah dikena ba Miri
MIRI: Aplikasyen Sarawak Pay, mobile e- Wallet ti dipejalaika perintah nengeri udah dipungkal di Miri kena Hari Enam tu tadi, rambau karnival pemakai enggau pengawa mandang ti diatur di puak mengeri tu.
Nitih ku menijar besai Sarawak Multimedia Authority (SMA) Dr. Zaidi Razak, Sarawak Pay diatu datai ba peranak Miri dikena ngelala enggau ngajar sida pasal pemaik sereta mega perengka guna transaksyen e-Wallet enggau bayar digital.
“Berebak enggau nya, insentif mata duit ti narit ati mega bisi diberi ngagai bala pengguna enggau pedagang lebuh sida bekenaka transaksyen Sarawak Pay,” ku iya lebuhka dirandau ba karnival nya.
Ku Dr Zaidi nambah, tuju pekara tu dikena meransang peranak di menua tu ngemeranka gaya idup digital, enda bekenaka mata duit, seriris enggau pemansang ekonomi digital di nengeri tu.
Dikena meransang mensia mayuh rejista enggau aplikasyen e-Wallet, ku iya, diatu bisi promosyen ke alai pengguna baru rejista Sarawak Pay deka bulih upah RM5 dipasuk ngagai e-Wallet sida pengudah sida mujur rejista.
“Pedagang rejista mega deka diberi 10 peratus upah khas mata duit ba tetiap transaksyen dikumpul kediri nengah Sarawak Pay,” ku iya nambah.
Sarawak Pay versyen 2.0 udah dilancharka Kepala Menteri Datuk Patinggi Abang Johari Tun Openg rambau International Digital Economy Sarawak (IDECS) Conference and Expo di Kuching dalam bulan Mei tu tadi.
Versyen baru nyediaka pemeri wallet besai manggai RM3,000 enggau fungsi tambah baru ari wallet-towallet ngagai transfer, split bill enggau minta bayar ari bakih.
Aplikasyen Sarawak Pay ulih dibatak pengguna di Google Play Store ungkup Android enggau Apple Store ungkup versyen IOS.
Penerang silik agi tau ditemu ba website rasmi Sarawak Pay di https:// sarawakpay.gov.my.