Industri lada nyendiaka pengawa puang ngagai 67,000 ruang bilik
MIRI: Industri lada ti majak ngerembai mansang di nengeri tu udah nyendiaka pengawa puang ngagai 67,000 ruang bilik nitihka rikod Opis Menteri Industri Besai naka ensana.
Nitih ku Sapit Menteri iya, Shamsul Iskandar Md Akin madahka lada chelum enggau lada burak iya nya komoditi pemadu beguna di Sarawak ti ulih mansutka penatai pemisi ngagai rayat di nengeri tu.
“Kitai semua bela nemu Malaysia tu ba penuduk kelima di serata dunya ti mansutka asil ngagai industri lada chelum enggau lada burak.
“Nya kebuah tu nyadi komoditi pemadu beguna ti tau mansutka penatai pemisi enggau nitihka rikod naka sehari tu, industri lada di Sarawak udah nyendiaka pengawa puang ngagai 67,000 ruang bilik,” ku iya.
Iya mansutka jaku nya lebuh bejaku ba Majlis Silaturahim Gawai Raya enggau Pengerami Meri Terima Kasih Perintah Pakatan Harapan Malaysia 2018 di Dewan Warisan Kedayan Jati Mierek ditu, ensana.
Sama bisi datai Sekretari Politik Opis Menteri Pemansang Indu, Ruang Bilik, enggau Komuniti, Rodziah Ismail.
Pia mega ku iya, iya dipelaba deka ngatur randau enda lama agi enggau ejensi bekaul industri lada di Sarawak berandauka ubah besai dalam industri tu ngambika ulih mansutka belanja rayat.
Berebak enggau nya, Shamsul Iskandar meri langgur penemu ngagai perintah nengeri begulai enggau perintah besai berunding enggau ngiga jalai mutarka penanggul tanah adat Kedayan Jati Mierek di sitak Padang Kerbau.
“Ba penemu aku, tu siti pekara ti enda tau enda dipejalaika kitai ngiga jalai ti manah, bela untung, ba pengawa kitai mutarka penanggul tu.
“Ari pengawa enggau komitmen semua, kitai deka ulih mutarka penanggul tu,” ku iya.
Kemari iya nya pejalai keterubah Shamsul Iskandar ngagai Miri pengudah 12 hari dipadu nyadi Sapit Menteri Industri Besai.