Apai indai patut ngelala pengulih bala anak diri

SARIKEI: Ngelala pengulih diri beguna amat nyengkaum pangku pengawa apai indai ba pekara ngelala pengulih bala anak diri, pia ku Residen Bagi Menua Sarikei, Mohammad Junaidi Mohidin.

Ku iya, nengah pemereti ati baka tu, bala anak deka ulih ditempa ngambika nemu tunga kuing sida laban bisi sukung enggau peransang ari apai indai ti bejalaika pangku pengawa ngerandang jalai ngagai sida ngerembaika pengulih diri empu.

Apai indai enda patut mejal bala anak sida nurutka peneka sida aja ti enda ulih ditangkup enggau enda dikerindu bala anak dataika pengulih tauka pengelebih ti bisi dikembuan bala anak enda tebantai lalu tu mai pengerugi ngagai bala anak nya.

“Apai indai ti pintar runding patut nyadi bakih bala anak ngambika pengulih bala anak tebantai.

“Chara muntang apai indai ngelala pengulih bala anak iya nya ari aktiviti begulai enggau beratika gaya ulah sereta pengelandik ti dikembuan sida,” ku iya.

Mohammad mansutka jaku nya rambau pengawa bejadika Program Komu- niti Prihatin ti berambaika jaku Mengenali Potensi Diri Dalam Keluarga, lemai kemari.

Program tu diatur Komiti Palan Aktiviti Nembiak Mit Sarikei enggau kerejasama Opis Pengintu Pengelantang Mensia Mayuh ( JKM) ti diatur di Balai Sri Sarikei, Sekula Sekondari( SMK) Baru Sarikei.

Kenu ku Mohammad, semekih ba dunya kemaya hari majak mar ti begunaka semua raban kreatif, inovatif enggau ulih besemekih agi.

“Barang sapa ti ngembuan pakej tu deka ulih terus idup ba dunya majak mayuh pemar, seraya sida ti enda nyikap diri deka tepekul sereta tinggal.

“Nya kebuah kitai ngarapka bala nembiak chakah ngaul diri dalam bidang kokurikulum ti diatur raban sekula ngambika sida ulih nyemelaka penyapai dalam bidang akademik,” tandu iya.

Sepenyampau 190 iku nembiak Pom 1 enggau 2 sereta bala apai indai ari SMK Sarikei Baru udah ngulu program tu.

Sama bisi datai Pemesai Pengintu Pengelantang Mensia Mayuh Bagi Menua Sarikei, Tang Kee Lee.