Pengawa ngaduka sistem parit, entali ai di Lambir berengkah ujung taun tu

MIRI: Pengawa ngaduka sistem parit enggau entali ai di Lambir ngaul belanja RM10 juta dipelaba deka berengkah dipejalai ujung taun tu tauka dalam pun taun baru.

Kaban Kunsil Nengeri ( ADUN) Lambir, Ripin Lamat madahka tu ngaul tiga endur iya nya Taman Tunku, Sungai Rait enggau Tukau.

“Kitai deka magi belanja tu nitihka peminta projek ba ketetiga endur tu dikena nyeleti sekalika sistem parit, ngupas sungai enggau ke bukai,” ku iya rambau Pengerami Ramah Tamah Aidilfitri di rumah iya kemari.

Ku Ripin nambah semua ejensi bejalaika pengawa baka Majlis Bandaraya Miri (MBM), Opis Parit enggau Entali Ai (JPS) sereta ejensi bukai deka berandau bekaul enggau pekara nya.

“Kitai deka berandau enggau kesemua ejensi bejalaika pengawa ngambika berandau sereta ngelala pun penanggul bah tunggal nyadi enggau pengawa dikena mutarka iya,” ku iya.

Ku Ripin, nyangka tu deka dipejalai abis tumu bulan Disember tu tauka dalam bulan Januari taun baru laban agih belanja sepenyampau RM10 juta udah dikemendar.

Ditanya sekalika bisi tauka nadai Taman Tunku napi penusah bah tunggal ketegal ujan bangat apin lama ke udah, Ripin ngaku pekara nya nadai agi nyadi.

“Taja pia kitai agi irau laban gaya parit ti apin tembu digaga enggau agih belanja tumu RM1.5 juta, enda chukup,” ku iya.

Sebedau tu, Kepala Menteri Datuk Patinggi Abang Johari Tun Openg udah ngemendarka belanja penyampau RM10 juta dikena nyeleti sistem parit enggau entali ai di Lambir.

Iya dikemendar rambau Program Sejiwa Senada 2018 Sibuti di laman Palan Transformasyen Menua Pesisir (RTC) Sibuti kena 1 Mei tu tadi.

Lebih 100 iku pengabang datai ari bala ketuai raban bansa, ketuai ejensi perintah enggau peribit sereta mensia mayuh ngulu pengerami ngelalu pengabang nya.

Kelimpah ari dinah bemacham bansa pemakai Hari Raya, bala nembiak mit mega bisi diberi duit raya sereta main enggau karaoke.