Perintah Nengeri meri jamin terus bekerejasama enggau Perintah Besai
KUCHING: Kepala Menteri ( KM), Datuk Patinggi Abang Johari Tun Abang Openg meri jamin diak Perintah Nengeri deka terus meri kerejasama ngagai Perintah Besai ba atur pemansang di Sarawak.
Pekara nya dipansutka iya lebuh dikerandau pemberita di Palan Penerbai Bilun Antarabangsa Kuching ditu( KIA), kemari.
Dulu agi ari nya, Abang Johari nyempulang pemulai Menteri Besai Tun Dr Mahathir Mohamad pengudah 2 hari nemuai ke Sarawak.
“Iya (Tun Mahathir) gaga sereta temegah enggau pemansang di nengeri tu,’ ku Abang Johari.
Iya pechaya Perintah Besai deka ngenegap kaul entara Perintah Nengeri tajapan bisi bida.
Sebedau pulai ke Kuala Lumpur, Tun Mahathir enggau Abang Johari bisi ngulu licha pemansang Sarawak ke digaga ulih Sekretari Perintah Nengeri Tan Sri Datuk Amar Mohamad Morshidi Abdul Ghani di Wisma Bapa Malaysia.
Ba licha nya, Tun Mahathir meri jaku puji ngagai Perintah Nengeri ba pemujur enggau pemansang ke udah ditempa.
“Nambahka nya, iya mega bisi ngenataika sekeda perambu ngagai kitai ngambi tau ngelengkas atur pemansang ditu,’ ku Abang Johari.
Abang Johari mega madah ngagai Tun Mahathir diak program pemansang tu ukai semina betatika Mengeri Kuching aja.
“Kitai deka ngaga mayuh agi program pemansang di menua pesisir kelebih agi ba sukut infrastruktur,” ku iya.
Bela nganjung Tun Mahathir sereta bini, Tun Dr Siti Hasmah Mohd Ali di KIA, Datin Patinggi Dato Juma’ani Tun Tuanku Bujang; sapit Kepala Menteri, Datuk Amar Douglas Uggah Embas, Menteri Pekara wang II Dato Sri Wong Soon Koh, Menteri Utiliti Dato Sri Dr Stephen Rundi enggau menteri bukai.