Bisi mega madah tanah nya tau dikena tang enda diempu, kebendar nya nadai dalam RUU Kanun Tanah (Ubah) 2018
SIBU: Sapit Kepala Menteri Datuk Amar Douglas Uggah Embas nimbal jaku enda lantang ati ti madahka perintah deka ngambi tanah ngelui ari 1,000 hektar ti udah dikemendarka ba ubah baru Kanun Tanah.
Iya madah, ubah nya ti mungkur hak ngempu tanah Pemakai Menua (PM) enggau Pulau Galau (PG) udah disetujuka ba aum Kunsil Nengeri empai lama tang mayuh jaku ditempa nangkan ke pemutus nya digaga.
“Ubah ti udah disetujuka tu iya nya orang asal Sarawak ulih ngenataika peminta ngempu hak tanah nyentuk 1,000 hektar tauka 2,500 ekar ti mungkur PM enggau PG.
“Tang udah ubah nya digaga bisi orang nguji malut runding rayat madahka lebih ari 1,000 hektar nya tanah nya deka diempu perintah. “Nya jaku ti enda amat. “Pia mega, bisi mega madah tanah nya tau dikena tang enda diempu nya mega jaku sengaja digaga,” pia ku iya madah.
Iya nerangka pekara tu maya bejadi Malam Ngiling Bidai Gerempung Raban Nembiak Dayak Sarawak (PEBEDAS) Pampang Sibu 2018 ditu, malam kilah ensana.
Kelimpah ari nya, Uggah ti mega Menteri Betanam Betupi Moden, Tanah Adat Asal enggau Pemansang Kandang Menua bela nimbal jaku ti madah PMPG tau dikena tang enda tau dijual.
Ku iya, nya endang amat laban perintah enggaika rayat nyual tanah sida ngambika tanah nya semampai diempu rayat nyentuk ke jemah ila.
“Tang kitai ngelaluka rayat ngemansangka tanah nya ambika banding baka nanam sawit tauka nama getah.
“Taja pia rayat tau madah ngagai perintah dulu nyema deka ngemansangka tanah sida,” ku iya madah baru.
Uggah madah, kebendar iya jaku nya digaga laban ba penemu sida ubah nya digaga laban perintah semina deka ngambi tanah rayat kelimpah enda tentu meretika ubah baru nya sereta ngaga cherita ke enda betul tauka dipolitikka sida.
Nambahka nya, iya bela madahka ubah baru nya mega deka ngeluarka pala tanah ngagai orang ke beempu menua, nadai bebayar sereta tanah nya enda ditatak pengelama ngempu tang semampai nyadi hak rayat belama.
Berindik ari pekara nya, Uggah enggau tu minta tuai raban bansa nerang ubah tanah nya enggau silik ngagai rayat pegai sida.
Iya mega madah, sebedau pemutus nya digaga suba, komiti iya bekenaka setaun setengah mansik sereta berandau ti bela ngempung buah penemu ari tuai raban bansa enggau raban profesional Dayak.
“Pemutus tu ukai senang digaga sereta randaka awak enggau penemu mayuh.
“Pemujur pemutus tu digaga bela mandangka perintah nengeri ti betuaika Kepala Menteri Datuk Patinggi Abang Johari Tun Abang Openg semampai mending penusah sereta ngemana peminta rayat,” pia ku iya madah.
Sama bela datai maya tu iya nya bini Uggah Datin Amar Doreen Mayang, Penyanding Penemu PEBEDAS Sibu Romeo Christopher Tegong enggau Mejar (K) Alexander Kadir Dato, Kaban Kunsil Nengeri (ADUN) Machan Allen Siden Gramong, ADUN Layar Gerald Rentap Jabu, ADUN Serembu Miro Simuh, Sekretari Politik Kepala Menteri Maurice Giri enggau Petrus Sigat, Presiden PEBEDAS Sarawak Alexander Frederick, Chairman PEBEDAS Sibu Joshua Jackson enggau Manijer Projek Pengerami Wilfred Ugap.