Pengawa gian dadah nyadi penanggul ba bala nembiak
MIRI: Pengawa gian dadah nyadi penanggul ke besai ke digaga bala nembiak di genturung pendiau, ke ngujungka ketegal gian dadah nya ngasuh sida iya napi penanggul penyakit rama baka nyerungkai rumah sereta pengawa salah bukai.
Menteri Muda Orang Indu, Ruang Bilik enggau Pemansang Anak Mit, Rosey Yunus madahka bisi pemerat ke semua renggat mensia mayuh ke diau di genturung pendiau, apai indai sereta opis ke bekuasa mantu mensia mayuh di genturung pendiau lepas ari penanggul dadah enggau pengawa salah.
“Trend basa tu ngirauka ati lebuh dadah udah belabuh masuk ke genturung pendiau laban bala nembiak muntang agi nguji dadah lalu ngujungka sida iya gian,” ku Rosey madah lebuh bejaku ba atur pengawa ‘Raya Aidil Fitri’ ti diatur ulih ‘Gerai Hentian Bersama KRT Kampung Padang Kelulit’, Bekenu ditu, kemari.
Sama bisi enggau ngulu atur pengawa, Kaban Parlimen (MP) Sibuti Lukanisman Awang Sauni, Sekretari Politik ngagai Kepala Menteri, Sarkawi Suhaili enggau chairman pengatur, Saaie Ahad.
Rosey nandu baru madahka mensia mayuh ke diau di genturung pendiau dia enggau JKKK meseti bejalaika pengawa sida ngemunaska pengawa gian dadah di genturung pendiau dia.
Iya madah utai ke ngirauka ati, iya nya mayuh ari sida ke gian dadah tu bala nembiak, ke tau nyadi ketuai kitai jemah ila, lalu umur bansa tu ke muntang agi gian dadah laban bisi bekal ke chukup, lalu muntang diulih ari sida ke enda betanggungjawab.
Iya madah taja pan ari sukut ekonomi datai di genturung pendiau kemaya hari tu, siti pengawa ke jampat laban pemoden dunya kemaya hari tu muka mayuh peluang dagang.
Dalam timpuh nya mega ku iya, kelimpah ari pemansang datai di genturung pendiau, dadah pan enda lepas sama masuk ke genturung pendiau sereta datai ba bala nembiak. Nya alai ku iya, trend bansa tu enda tau enda dikemutarka lalu patut digaga nyadi siti pemerat.
“Penanggul bansa tu patut diperatika enggau serius ulih apai indai, mensia mayuh ke diau di genturung pendiau dia enggau JKKK laban dadah kemaya hari tu majak mayuh dadah bansa baru ke majak nambah matak bala nembiak kitai lalu ngerusak gaya dudi hari sida iya jemah ila, enti enda dikeemunaska,” ku iya.
Rosey ti mega nyadi Kaban Kunsil Nengeri ( ADUN) Bekenu madahka, sida ke ngidar dadah nemu mensia mayuh ke diau di genturung, orang ke bisi pemisi lalu bala nembiak pan lantang ulih meli.
Iya nandu baru madahka pengawa ke pengabis manah digaga ngemunarka dadah, iya nya madah ngagai mensia mayuh bakani ku dadah tau ngerusakka mensia mayuh, lalu ajar bala anak kitai, pendiau ke menyana.
Apai indai anang sesekali nutup mata sida iya enti bisi kaban dalam ruang bilik nya bisi ditemu makai tauka ngidar dadah, ku iya.
Rosey nangkan nya madah ngagai apai indai nyema bisi anak sida iya napi penanggul gian dadah, anak sida iya patut dianjung berubat ba palan rehabilitatsi dadah di menua tu.
“Nganjung anak kitai ngagai palan rehabilitasi ukai pengawa ke enda manah tang ke pemaik bala anak kitai. Kitai enda ulih nejuka penanggul tu enda dikemutarka, lalu sida ke gian dadah dianjung ngagai opis bekuasa ke betatika penanggul dadah,” ku iya.
Ba lansa bukai, Rosey nimbal pasal Kampung Padang Kelulit alai iya madah, sebedau bisi jalai Pan Borneo, penuduk genturung pendiau ba ulu sungai di Kelulit lalu diatu Kampung Padang nya ba tisi jalai aja ba jalai besai Pan Borneo nya.
Iya nandu baru madahka, Kampung Padang diatu udah maju lalu majak dikemansangka, lalu nadai agi kena tinggal ba ulu sungai, alali kitai ku iya patut berunding sereta betatika pekara ke bisi kait enggau pemansang komuniti.
Ba atur pengawa nya mega, Rosey besemaya deka meri geran RM5, 000 ke komiti pengatur sereta pemeri RM5,000 ari MP Sibuti Lukanisman Awang Sauni.