Kaunsil Palan Servis Komuniti UPP ngatur konvoi nyerumba Hari Sarawak
SIBU: Kaunsil Palan Servis Komuniti Parti Rakyat Bersatu (UPP) deka ngatur konvoi beserimbai enggau Hari Sarawak kena 22 Julai tu.
Chairman sida, Dato Andrew Wong madah, batang tuju program tu iya nya dikena ngelai pengawa ngintu Hari Sarawak serata mai rayat bukai bela nyereta.
“Tu program kami ninting taun. Taun siti suba kami ngagai konvoi ari Sibu ke Sarikei.
“Taun tu kitai nandu konvoi ke Bintangor,” pia ku iya madah ngagai pengarang berita sepengudah nemuai ngagai Pemesai Opis Pelilih Meradong Haron Mahidi ba Opis Pelilih Meradong di Bintangor, ensana.
Maya nya, iya mega bisi nyuaka baju konvoi ngagai Haron lalu nerangka program nya.
Iya madah, iya empu deka betuaika konvoi nya ila sereta melabaka urung 500 iku penyereta ngena 460 buah kerita enggau 400 buah mutosikal besai.
Kelab mutosikal besai enggau ti ngambi bagi ba konvoi tu iya nya Razz Chopper Malaysia, Smart Bikers Group, VSOS Group, Freerider Moto Com, Hornbill MC, GMC, 96 Section Bikers Com, R25 S’wak Central Region, Team KRLCCS 150, Dayak Bikers Sibu, Independent Biker GP, Sarikei Bikers, Street Bikers MC, BIBB, FZ Crew sereta mayuh agi.
“Kitai ngarap bala penyereta gaga ati bela ngambi bagi ba konvoi tu seraya kitai bela ngintu Hari Sarawak,” ku iya sambil madah konvoi nya deka belabuh di Swan Square urung 7.30 pagi kena 22 Julai tu.