DUN nerima sukung majoriti ngapil ngagai Kort Federal bekaul kes ADUN Pujut
KUCHING: Dewan Kunsil Nengeri udah ngemendarka perambu minta pemendar ngapil ke pemutus Kort Apil kena 13 Julai 2018 ti dibantaika Menteri Dagang Temuai, Seni, Main asal, Nembiak enggau Lumba enggau Main Datuk Abdul Karim Rahman Hamzah, kemari.
Perambu ke dibai Abdul Karim nya disukung Kaban Kunsil Nengeri (ADUN) Semop ti mega Menteri Muda ba Opis Kepala Menteri (Pekara Korperat),Abdullah Saidol.
Pemutus nya dipadahka Sapit Speaker Dewan Kunsil Nengeri Dato Gerawat Gala pengudah bulih sukung majoriti ari Kaban Kunsil Nengeri.
“Bisi 68 iku nyukung perambu lalu semina tujuh iku enda nyukung. Aku enggau tu madahka perambu tu enggau nama Menteri Dagang Temuai, Seni, Main Asal, Nembiak enggau Lumba enggau Main, dikemendarka.
“Dewan Kunsil Nengeri deka ngaga peminta ngagai Kort Federal minta pemedar ngapil,” ku iya.
Gerawat mansutka pekara nya lebuh ngaga pemutus bekaul enggau perambu ari Menteri Dagang Temuai, Seni, Main Asal, Nembiak enggau Lumba enggau Main, Datuk Abdul Karim Rahman Hamzah ba Aum Kunsil Nengeri Ke-18 Hari Ke-8 ba Kompleks Kunsil Nengeri ditu, kemari.
Dulu ari nya lebuh ke mantai sereta nyimpul perambu nya kemari, Abdul Karim ti mega Kaban Kunsil Nengeri (ADUN) Asajaya madah, kena 13 Julai 2018, Kort Apil nengah pemutus majoriti, nulak apil Dewan Kunsil Nengeri Sarawak nya ngagai pemutus Kort Tinggi ngambi mulaika baru Kaban Kunsil Nengeri Pujut nyadi kaban kunsil tu.
Iya madahka perambu ke dibantaika nya nadai ngembuan juluk bisi dendam enggau Pujut sereta ukai pengawapolitik ngagai Yang Berhormat Pujut.
Tang tu bekaul enggau kuasa sereta pematut Kunsil Nengeri ngelindung tauka nyaga Kunsil Nengeri, ku iya.
Bejaku baru iya madah, siti ari isu sebedau apil nya sekalika Kaban Pujut pengudah bulih peranak menua Australia, udah lenyau ari dipilih nyadi kaban dalam Kunsil Nengeri lalu udah nya, sekalika pemutusngeleng- kaka peranak menua nya udah nya bisi empas aika pemaikti lenyau .
“Dua iku akim nyemetak iya nya akta ngulihka peranak menua menua luar bisi empas nginsil nya dipilih nyadi kaban dalam Kunsil Nengeri.
Ke pemadu beguna agi, kededua akim enda setuju enggau pemutus Akim Kort Tinggi sereta bepenemu iya nya pematut belama sereta enda ulih pulaika, iya.
Abdul Karim mega dalam aum pengarang berita nyebut pekara ti sama madah, pengawa mantaika perambu nya ukai dikena ngelaban ADUN Pujut nya.
“Baka ke ditemu, kitai bisi ngerejista siti perambu ari Kort Federal ngambika ngerejista apil ngagai pemutus ti udah digaga Kort Apil kena 13 Julai 2018.
“Endang niat perambu tu direjista ukai ati diri Kaban Kunsil Nengeri Pujut, sereta ukai ngachau pengawa politik Kaban Kunsil Nengeri Pujut nya,” ku iya ti nandu pekara nya baru dalam aum pengarang berita ba Bilik Media ba Kunsil Nengeri, kemari.
Maya perambu nya dipejuraika, perambu ke sama mega dipejuraika Kaban Kunsil Nengeri ( ADUN) Bukit Assek Irene Mary Chang Oi Ling ti ngarika Parti Tindakan Demokratik (DAP), madahka pemutus perintah nengeri ngapil ngagai Kort Federal,siti pemutus ti enda pintar
Iya bepenemu pemutus perintah Gabungan Parti Sarawak (GPS) enda berundingka pemerat dalam pekara nya.
Iya mega madahka ngapil kes nya mega deka begunaka luyar sereta akim kelimpah ari ungkus ti begunaka belanja dikena neruska prosiding nya.
“Mai apil tu, reti nya duit pemayar chukai deka dikena Dewan Kunsil Nengeri ngapil kes sereta udah tentu nya ngena ke mayuh,” ku iya ti nandu pekara ke sama ba aum pengarang berita ke diatur ba Bilik Media DUN ditu kemari.
Bejaku baru iya madah, nyema pengawa bepilih mit ( PRK) diatur mega ukai semina begunaka belanja tang mega semua pengawa bepilih deka magang.
“Ba kami ( DAP) nadai penanggul ngetanka sitak nya tang neruska kes tu deka masau duit tauka belanja rayat,” ku iya.