Kastam Sarawak ngerampas segerit, ai bisa MDNP di Tedungan, Limbang

KUCHING: Opis Kastam Diraja Malaysia ( Kastam) Sarawak ngerampas segerit enggau ai bisa ke dipelabaka mungkur penyampau RM170,394.49 sereta ngaul chukai urung RM792,761.10 lebuh Kastam datai ngenyit lalu meresa enam buah kedai di sitak Tedungan, Limbang, bedau lama tu tadi.

Direktor Kastam Menua, Datin Sharifah Halimah Tuanku Taha madah, abas ngenyit nya digaga berindik ari patau ke digaga lalu tetemuka mayuh ari utai pakai sereta ai irup di sitak nya bejalaika pengawa nyual ai bisa sereta segerit ke enda dikemendarka ke dalam penuduk “Malaysian Duty Not Paid” (MDNP).

Ku iya, barang ke kena rampas nya nyengkaum 976,732 batang segerit ari bemacham bansa ke dipelabaka dalam RM69,992.97 ngaul chukai dalam RM515,344.45 enggau ai bisa 6,326.37 liter dalam RM100,401.52 sereta chukai RM277,416.65

“Ai bisa enggau segerit ke nadai mayar chukai “Malaysian Duty Not Paid” sereta enda dikemendar ulih kastam dipelabaka dibai tama nengah jalai tasik ari Pulau Labuan.

“Pengawa dagang nya dipelabaka dibai tama nengah chara ngena bot berikan ke munggah barang nya di tebing Sungai Limbang,” ku iya madah nengah siti penerang ditu, kemari.

Sharifah Halimah madah, ai bisa sereta segerit ti dibai tama enggau chara salah nya deka dijual ngagai pengguna di Sarawak sereta makit ari menua sepiak, rayat Brunei ke ngelawa sitak Tedungan.

“Operasi ti dipejalaika nyadi pengawa ke nagang bebai sereta nyual komoditi ke enda dikemendarka di sitak nya.

“Atur ke terit deka digaga ba sida ke bempu kedai ke bisi kaul enggau pengawa bebai sereta bejualka barang ke enda dikemendarka,” ku iya.

Mensia mayuh ditesau meri kerejasama lalu madah enti bisi nemu sebarang pengawa bebaika dadah sereta barang bukai baka segerit, ai bisa enggau merechun, lalu ngeripot ngagai Talian Bebas Tol Kastam 1-800-88-8855 tauka Opis Kastam ke semak enggau sida iya, di semua nengeri.