MLGH nyangkal dawa ADUN Padungan projek PJH ukai projek opis menteri nya
KUCHING: Menteri Kaunsil Kandang Menua enggau Pengawa Berumah (MLGH), Datuk Dr. Sim Kui Hian nyangkal dawa Kaban Kunsil Nengeri (ADUN) Padungan, Wong King Wei madahka iya udah meri penerang enggau penyampau ti nyaruka penemu ngagai Aum Kunsil Nengeri (DUN) bekaul enggau pejalai projek Sepital Petra Jaya (PJH).
Nitih ku iya, naka 23 April 2017, pengerembai ke amat ti diripot sentang Sepital Petra Jaya iya nya 46.77 peratus dibida pengerembai 99.79 peratus baka ti ditimpuh.
Seraya naka 22 Oktober 2017, pengerembai ke amat ti diripot iya nya 27.68 peratus dibida pengerembai 100 peratus nitihka timpuh ti udah ditetapka.
“Beratika penerang tu, bisi kurang ba pengerembai ke amat ari 46.77 peratus ngagai 27.68 peratus iya nya -19.09 peratus.
“Bida ba penyampau tu ketegal ubah ba metodologi nyerenih pengerembai kereja dibida pengerembai pekara wang baka ti diterang Opis Kereja Raya (JKR) Malaysia iya nya ejensi ti bejalaika projek,” ku iya rambau aum pengarang berita di DUN, kemari.
Kelimpah ari nya, Dr. Sim mega nyemetak madahka projek Sepital Petra Jaya ukai di baruh pegai opis menteri iya, tang dipejalaika JKR Malaysia.
“Opis Pengerai Sarawak nyadi siti ari opis perintah besai di baruh jaga opis menteri aku.
“Semua penerang bekaul enggau pengerembai projek tu disediaka JKR Malaysia ngagai opis menteri aku nengah Opis Pengerai Sarawak,” ku iya.