KPKKBSS diasuh meri penerang ke silik pasal projek bejuta ringgit di Miri
MIRI: Menteri Dagang Temuai, Seni, Main Asal, Nembiak enggau Lumba Sarawak ( KPKKBSS) dipinta mantaika semua penerang silik pasal semua projek ti dipejalai di baruh opis menteri nya dikena nentuka projek berega bejuta ringgit ti dikemansang ulih meri pemaik ngagai mensia mayuh.
Kaban Parlimen (MP) Miri, Dr Michael Teo pengawa nya mega patut digaga dikena nentuka projek ti diperambu bela ulih diguna mensia mayuh, nyengkaum projek ti matak temuai sereta ulih meri pemaik ekonomi ngagai peranak menua tu.
“Aku mega deka nandu beberapa pekara ti dibantai sebedau tu bekaul enggau kereja ngangkatmanah ‘ Wireless Walk Miri’, ngansak raban opis menteri ngambika enda berumban bejalaika projek nya.
“Tang aku ngarapka opis menteri mansik projek ti deka enggau benung dipejalai enggau silik sereta dalam agi nentuka pangka ti meruan.
“Tu nyengkaum pekara bekaul enggau pemeresi, trafik, pengelikun sida ti bedarat, penanggul sekut, sebun, atur pengawa teda ai enggau bah tunggal ba sepanjai Jalai North Yu Seng,” ku iya.
Berebak enggau nya, Dr Teo mega madahka diri asa enggau sekeda raban ti saru penemu enggau penerang iya apin lama ke udah, ti ngumbai tuju iya deka nginsil projek ngangkatmanah ‘ Wireless Walk’ nya, tang pekara ke amat ukai baka nya, tunsang, ku iya.
“Tu enda amat, laban nitihka pengamat aku dekaka randau ti lurus agi sereta tebuka ngambi madah ngagai mensia mayuh ke alai semua pansik ti bekaul udah digaga enggau silik.
“Pia mega kereja ngangkatmanah deka nyadi siti agi projek ‘gajah putih’ ti bisi di tengah mengeri besai Miri,” ku iya.
Nangkan nya, Dr Teo mega ngingatka sekeda pengirau ti dibantaika mensia mayuh mega patut diputar jampat sebedau nampung pejalai projek nya.
Ku iya, timbal ari mensia mayuh, kaban kaunsil sereta kaban dagang ba dia mega beguna.
“Nadai sanggu, endur tu nyadi palan dagang ti sekut di Miri lalu siti agi, wang rayat penyampau RM3 juta, deka dibelanja ngagai sepenyampau belanja ti kala dibelanja ditu, enggau pemesai 20 endur paking kerita.
“Nya kebuah, lebuh iya ngaul wang rayat ti dikena enggau penyampau manggai bejuta ringgit, alai timbal ari semua piak ke bisi pemerat, sigi pekara ke patut,” ku iya nambah.
“Di Miri, kitai tebilang enggau Palan Penyangkai Kapal Miri, projek tasik dalam gajah putih ti apin ulih matak kapal tangki enggau kargo, kelimpah luntang kedai enggau agu mensia mayuh ba tengah jalai China Street,” ku Dr Teo seraya nambah, Miri nyadi mengeri dagang temuai, nadai agi ulih tebayarka projek-projek gajah putih, kelebih agi ti ngaul endur dagang besai.
Berindik ari nya, Dr Teo mega meri jamin deka nentuka projek ungkup rayat ulih diguna lalu meri pemaik ngagai rayat.
“Kami ( Opis Palan Servis Kaban Parlimen Miri) endang ngelalu sebarang langgur penemu dikena ngemanahka endur enggau palan dagang ditu nengah website ‘Facebook’ rasmi di https:// www. facebook. com/drmichaelteo.