Tapah Ata muji pengeregas Gerempung Pengasih Raban Lunggar Umur ngatur aktiviti di Kapit

KAPIT: Sekretari Politik Kepala Menteri Sarawak, Tapah Ata muji Gerempung Pengasih Raban Lunggar Umur Kapit ti regas sereta mai pemaru ngatur ‘ Program Signature Outreach and Search Warga Mas and Orang Kurang Upaya’ di Kapit enggau ngelingi ti udah mujur dipejalaika.

“Program tu chukup manah, aku rindu ati enggau orang lunggar umur di Kapit laban ke kering sereta regas ngatur aktiviti ke chukup manah enggau juluk ngiga orang lunggar utai ti begunaka bantu lalu meri bantu lalu ngaul sereta siru ke sida nyengkaum ti kurang benasit manah ba raban bansa kitai. Kita patut dipebasa laban udah ngereja pengawa enggau chukup manah,” ku Tapah Ata.

“Sapa madahka orang lunggar umur enda regas. Kita udah mandangka ngagai orang ti madahka orang lunggar umur tu lemi, sida salah. Bebekalka pengingin enggau pengeran deka mantu raban orang lunggar umur, kita udah mujur. Aku pechaya sesapa ke nerima bantu ari kita, deka berasai gaga amat ati,” ku Tapah lebuh ke nutup pengerami ba Rumah Madang Jelaini, km 5 Jalai Bukit Goram ditu bedau lama udah.

Ku iya, perintah ngaku tanggungpengawa ke besai ti di pejalaika raban orang lunggar umur. Ku iya, mayuh sida dichiri nyadi ketuai komuniti baka Temenggong, Pemancha, Penghulu, Ketuai Genturung Pendiau, Tuai Rumah dalam komuniti sida. Sida mih reta nembiak rebak baru laban ti ngembuan penemu enggau peneleba dalam pengidup ke tau dipekunsi enggau rebak baru.

Palan Servis Orang Lunggar Umur Kapit udah mujur ngelancharka ‘ Program Signature Outreach Ngiga Sereta Mantu Raban Orang Lunggar Umur’ di Kapit.

Tu mih keterubah program ke baka nya diatur Opis Pengintu Pengelantang Pendiau enggau Rama Kapit ke disereta kaban Gerempung Pengintu Pengelantang Pendiau Kapit ari baruh embing Temenggong Wilfred Billy Panyau enggau chairman Penghulu Steward Sawing sereta dibantu bala staf ari Opis Pengintu Pengelantang Rama Kapit, ti nyendiaka sukung logistik.

Program sehari nya berengkah tumu pagi ke alai semua kaban Gerempung Pengintu Pengelantang Pendiau Orang Lunggar Umur Kapit begempuru ba Kompleks Nengeri Bletih sebedau ngepunka pengawa.

Orang keterubah dilawa sida iya nya siku orang tuai ke benama Yeong Wah Ang (bujang sebatang), ke nyuwa bilik ba Pasar Baru ditu, ke alai sida nulung iya meresi ke bilik lalu nyuaka pakej pemakai ngagai iya.

Nangkanka nya, sida nampung pejalai ngagai Rahimah Bte Mahmuddin ba Kampung Baru ditu.

Ke penudi endar, sida ngagai Sungai Pelajau di Jalai Bukit Goram ngiga siku orang ti begunaka bantu ke benama Indau Anak Kuri.

Sama bisi datai ngagai pengerami nutup nya Pemesai Opis Pengintu Pengelantang Rama Kapit Peter Gabong, Temenggong Wilfred Billy Panyau, chairman Gerempung Pengintu Pengelantang Orang Lunggar Umur Kapit Penghulu Steward Sawing, sekretari Penghulu Daniel Dian, tukang pekara wang Penghulu Wong Kie Ing, Penghulu Madang Jelaini, Sng Geok Yien, Tuai rumah Midin Saong enggau ke bukai.

Pengudah nadai meda enggau ngasaika pemansang jampat dipelajai di menua ulu, langgur penemu Kepala Menteri numbuhka komiti ti gawa khas meri fokus ngagai kesemua peminta pemansang ari kandang menua tanah tinggi sereta peranak di dua sitak endang patut ba maya iya sereta penatai iya disambut. Dennis Ngau ADUN Telang Usan

Ku iya, komuniti menua pesisir di Ulu Baram lantang ati enggau optimis ke alai pekara tu deka berengkah tama ngagai kandang menua ulu enggau tanah tinggi berindik ari pekara ti dibantai bekaul enggau pengawa numbuhka ejensi pemansang fokus khas kandang dua taun ke udah.

“Pengudah nadai meda enggau ngasaika pemansang jampat dipelajai di menua ulu, langgur penemu Kepala Menteri numbuhka komiti ti gawa khas meri fokus ngagai kesemua peminta pemansang ari kandang menua tanah tinggi sereta peranak di dua sitak endang patut ba maya iya sereta penatai iya disambut.

“Ba timpuh kurang dua taun ari iya ditumbuh, ejensi tu berengkah mansutka asil enggau pengawa ngaga Palan Ngumpul Asil Betanam Betupi Tanah Tinggi (IHAS) bepalan di Long BanganLong Beruang-Long Peluan, Ulu Baram lalu diatu ba atur pejalai ngepunka aktiviti ekonomi antara beberapa rumah panjai dipilih di kandang HDA di tengah Baram ngambi ngepunka iya,” ku iya lebuhka berandau enggau The Borneo Post kemari (16 Julai).

Ku Dennis, pengawa numbuhka HDA di baruh Regional Corridor Development Authority (Recoda) – ejensi besdai dalam pemansang Projek Koridor Kuasa Ulih Dikena Baru Sarawak (SCORE) ari perintah nengeri ke suba – besemaya enggau rayat gagit ati, iya andal amat enggau hak sida sereta chakah ngaul diri, tanah tinggi patut ngasaika pat baru.

Nyadi siku ari kaban komiti HDA, Dennis ngarapka perintah besai baru di baruh Pakatan Harapan (PH) deka meda kebuah besai penumbuh Recoda, ke alai HDA diengkah di baruh, ti deka nempa kar enggau ngaga pelin timpuh panjai enggau timpuh pandak ba kededua pekara ekonomi enggau infrastruktur di kandang menua endur bejalaika iya.

“Nya kebuh, beguna amat perintah PH terus nyukung pemisi Recoda ngambika semua agenda pemansang kelebih agi ngaga rentayan sambung jalai menua ulu kena bungkur HDA kelebih agi ari pasar Long Lama ngelawa pelilih mit di Bario enggau Pasar Long Lama ngagai Long Lama, Ulu Tutoh,” ku iya.

Dennis madahka jalai kedua deka nyediaka chara ti manah dikena tama enggau pansut ari Taman Negara Mulu tebilang di dunya nengah perengka pengangkut darat enggau bot seraya meri sambung jalai ti meruan ngagai lebih 20 buah rumah panjai raban bansa Kenyah, Kayan, Penan enggau Kelabit enggau lebih ari 20,000 iku peranak ke diau di sepanjai jalai ti diperambu.

“Aku ngasaika semua kitai enggai meda perambu pemansang ti meri pemaik ngagai rayat kitai dilanjar, pengawa ngelanjar enggau nginsil iya semina ketegal perintah tauka perintah nengeri enggau perintah besai berubah ukai pekara ti sebaka,” ku iya nambah.

Dennis mega lurus ati meri terima kasih ngagai perintah Barisan Nasional (BN) ke dulu suda diketuaika exMenteri Besai Datuk Seri Najib Razak ba pekara ti udah digaga iya enggau perintah ke dulu suba ungkup sitak parlimen Baram, kelebih agi Telang Usan.

Ku iya, antara pekara ti manah dikereja Najib ungkup sitak iya ti ngemai pemaik ngagai komuniti menua pesisir, pekara ti diasaika sida nyentuk sehari tu nyentuk jalai belakin di Jalai Lapok, belanja ngaga begunan baru blok sekula SJK (C) Kee Tee Long Lama, agih belanja dikena ngangkatmanahka jalai batang ke dulu suba di Telang Usan enggau Mu sereta klinik bot mindah kin kitu.

“Idup dalam menua demokratik baka Malaysia, kitai meseti sedia setuju enggau pinta majoriti lalu nerima perintah baru di baruh pegai Menteri Besai Tun Dr Mahathir Mohamad enggau perintah Pakatan Harapan.

“tentu mega enggau lis panjai semaya bepilih ti udah dibantai ngagai bala pengundi lebuh datai ba hari 9 Mei taun tu tadi, kitai ngarap sereta melabaka perin tah besai deka gawa dikena nentuka kitai endang ngasaika ‘Malaysia Baru’ baka ti udah disemaya kelebih agi ungkup komuniti menua pesisir kitai di Sarawak.”