DUN nadai kala setuju enggau PDA
KUCHING: Hak ba pengeraja asal enggau undang-undang nyengkaum bekaul enggau petroleum, isu ekonomi ti besai sereta meri pengasai ati ngagai peranak Sarawak, pia ku Kepala Menteri Datuk Patinggi Abang Johari Tun Openg.
Iya madahka isu nya chukup ngungut ba ati rayat Sarawak kenyau ari taun 1974 lebuh Akta Pemansang Petroleum (PDA) keterubah endar dituku dalam Parlimen.
“Ke rikod, Dewan Kunsil Nengeri tu enda kala setujuka PDA nya.
“Tuju kitai iya nya mulaika hak Sarawak baka ke ditulis dalam Sempekat Malaysia 1963 - sempekat antarabansa entara Sarawak, Sabah, Singapura enggau Malaya dikena numbuhka Gempung Malaysia ti nyadika Sarawak kaban kunsi ti sama enggau Tanah Melayu enggau Sabah,” ku iya.
Abang Johari mansutka pekara nya ba jaku nutup jurai ba Aum Kunsil Nengeri Ke-18 Hari ke-8 ti diatur ba Kompleks Kunsil Nengeri ditu, kemari.
Ku iya entara hak nya baka hak Sarawak bisi undangundang kitai kediri empu, nyengkaum ke digaga sebedau penumbuh Gempung nya.
Ordinan Ngelumbung Minyak Sarawak 1985 iya nya siti undang-undang ti manah ti agi diterik nyentuk ke sehari tu.
“Ordinan Ngelumbung Minyak Sarawak 1958 meri kuasa nyaga sereta ngatur penuh Sarawak ngagai semua orang enggau kompeni ti ngemeranka operasyen industri minyak enggau gis di Sarawak,” ku iya.
Petronas ngapil ngagai Kort Federal dikena ngulihka pengamat ke alai Ordinan Ngelumbung Minyak Sarawak 1958 udah dipadam endar nengah Akta Pemansang Petroleum, ku iya.
“Kitai gaga peminta deka ngulihka pengamat nya ba Kort Federal ditulak Kort Federal kena 22 Jun 2018.
“Ba maya tu mega, Sarawak benung neritka Ordinan Ngelumbung Minyak 1958 enggau Ordinan Nyadung Gis 2016 berengkah 1 Julai 2018 nengah Sarawak Minerals and Management Authority (SSMA) Petroleum Sarawak Bhd tauka PETROS,” ku iya.
Ungkup neritka nya diteritka agi nengah Rang Undangundang Ngelumbung Minyak (Ubah) 2018 ti dikemendarka Dewan Kunsil Nengeri kena 10 Julai 2018, ku iya.
Nengah Ordinan Nyadung Gis ku iya, Perintah Sarawak deka gawa rat enggau Opis Menteri Dagang Dalam Nengeri enggau Pekara Bebeli Barang Perintah Besai bekaul enggau pengawa ngagihka gis asli ngagai penguna di Sarawak.
Kitai ngarapka Petronas ulih meretika penuduk Perintah Sarawak, ku iya seraya deka nentuka pengemeran industri minyak enggau gis ba nengeri tu iya nya endang bisi pematut sereta kemerah ba dagang.
“Tambah mega, Pakatan Harapan dalam manifesto PRU14 besemaya deka nyerahka royalti petroleum 20 peratus, niki ari 5 peratus ngagai Sarawak.
“Tu kelai Perintah Besai Pakatan Harapan bisi pengasih ngagai peranak Sarawak ba atur pengawa sida, ambis nadai, bekaul enggau petroleum,” ku iya.