Sarawak deka nyadi tuai pengatur TrIBE 2018
KUCHING: Sarawak deka nyadi tuai pengatur ‘Business Events Tribal Meet’ tauka dikelala ngena nama “TrIBE” 2018 ungkup keterubah iya kena 24 Ogos tu di mengeri besai tu dikena meransang transformasyen digital dalam sektor pengawa dagang.
Ba penerang berita iya ditu kemari, gempuru besai nya deka ngemai rintai speaker besai nyengkaum Corbin Ball, ti dichiri lima kali ungkup ‘25 Most Influential People in Meeting Industry’ enggau pakar jaku gempung tebilang, Christian Chua kelimpah ngempuru empat gempung kuasa dunya.
Antara iya Persatuan Konvensyen dan Kongres Antarabangsa ( ICCA), Professional Convention Management Association (PCMA), International Association of Professional Congress Organisers (IAP- CO) enggau Union of Internationl Associations (UIA) ba pengawa neresa enggau meransang pengerembai industri.
TrIBE 2018 ti nyadi siti inisiatif ari Biro Konvensyen Sarawak (SCB) deka ngempung lebih 200 profesional ba atur pengawa dagang ti mungkur sida ti ngaga pemutus ari serakup nasional, duta gempuru besai, bakih kunsi sektor pemadu atas enggau pemesai perintah sereta media dunya enggau nasional.
“Ba pengawa Sarawak napi transformasyen ekonomi digital, pengawa pengawa dagang nyadi kritikal agi dibida sebedau tu.
“Tetiap gempuru besai, pengawa mandang tauka sebarang atur aum, udah meri asil betukarka penemu ti jampat amat. Nya alai, iya ninggalka pangka besai ti udah ngemuntangka pen- gawa transformasyen tu,” ku Ketuai Pemesai Operasyen SCB, Amelia Roziman.
“Sama baka nyungkak ekonomi tradisional ngagai ( ekonomi) digital, sektor tu patut gawa baka tu. Nya kebuah, bakih kunsi industri kitai begunaka strategi ti betul ngambika mujur lalu tu ke alai TrIBE 2018 deka ngenyemakka takah nya,” ku iya nampung.
Gempuru besai tu mega deka mantaika pelasar begempung perintah baru, BESarawak Alliance enggau mega anugerah besai ba Sukut Pengawa Dagang iya nya ‘ Anugerah Anak Sarawak Kesembilan’.
Penerang silik bekaul enggau TrIBE 2018, tau ngelawa website http://www.tribeassembly.com/ tauka telefon nuju Pengatur Persidangan TrIBE 2018, Terence Lim ari Borneo Tru Events ba lumur 0138393365.