SEB, IAB ngatur program GreEL ungkup pengelicha, ketuai pengajar
KUCHING: Sarawak Energy Berhad (SEB) udah nyadi palan ngagai 20 iku pengelicha, prinsipal enggau kepala pengajar ari serata nengeri tu dalam program “From Great To Excellent Leaders” (GreEL) Opis Menteri Pelajar ti diatur Institut Aminuddin Baki (IAB) bedau lama ti udah.
Mandal Presiden Eksekutif, Servis Korporat SEB, Aishah Eden dalam jaku pengelalu meri terima kasih ngagai IAB laban milih SEB nyadi bakih korporat bejalaika program nya.
Iya bekunsi pasal transformasyen SEB ari sebuah serikat utiliti lama ngagai serikat korporat ti moden enggau lengkas meri servis ngagai 650,000 penguna ti nyengkaum penguna domestik, komersial, industri enggau eksport.
“Kitai gaga ati bekunsi pejalai transformasyen enggau penemu kami sereta bala pengajar ti tebilang ba nengeri tu.
“Kitai ngarapka pekara ti dikemeranka kitai dalam pengawa ngatur enggau pemansang pengeraja asal nyengkaum inisiatif transformasyen moden enggau digital sereta niat bukai dikena jemah ila ulih mai ngagai penumbuh profesional kita ke nyadi pengajar enggau pejalai kita empu nuju penyulut,” ku iya dalam penerang berita kemari.
Dalam penerang nya iya madahka rayat iya nya aset pemadu besai lalu kenyau 2011, pengereja pengawa (tenaga manusia) udah nambah sepenyampau 51 peratus lalu seharitu bisi urung 5,000 iku peranak Sarawak nyadi pengereja pengawa dalam mayuh bidang.
Ku iya SEB benung ngemansangka rayat dikena ngemajuka rababn profesional ti bepengulih dalam oraganisasyen tu dikena nentuka tikas pemanah gawa.
“Kitai mega mayuh inisiatif nyengkaum ‘Sarawak Energy Leading Women Network ‘ (SELWN) ti mekuh ngagai pengawa ngenegut enggau pemansang orang indu dalam SEB,” ku Aishah.
Iya madahka piak iya deka ngangkatka agi pengulih nambahka tikas guna kuasa ba Sarawak kelimpah ari ngemanahka agi bekal ti ulih dikearapka penguna.
Ku iya, pemansang komprehensif enggau holistik deka nyendiaka sistem elekterik moden ti senipak ba nengeri tu sereta rayat, ke lalu ulih ngangkatka visi nyadi kuasa tenaga ASEAN nengah penumbuh Borneo Grid.
Kenyau 10 taun ke udah, nengah saup agih belanja ari perintah besai enggau nengeri, bungkur domestik ba Sarawak diatu bisi 95 peratus sereta penyampau elekterik- fikasyen menua pesisir udah nambah ari 56 peratus ba taun 2009 ngagai 90 peratus sehari tu ti muka peluang pemansang sosio ekonomi enggau raban bansa.
Ketuai Pemesai Operasyen Gempung SEB, Lu Yew Hung madahka piak iya ngenukuka pemerat kerejasama enggau isntitusyen pelajar sereta udah nempa kaul pengawa pemansik begulai enggau sekeda institusyen senipak enggau siti palan beranakka puku SEB ti mekuh ngagai pelajar enggau raban biak.
“Pengajar bejalaika tanggungpengawa pemadu beguna dalam raban bansa kitai laban sida diberi tanggungpengawa memupuk enggau nyaga rebak dudi ila. Kitai menghargai enggau meri terima kasih ke sida tu,” ku iya.
GreEL sebengkah ari inisiatif Opis Menteri Pelajar di baruh Program Transformasyen Perintah (GTP) 2.0 dikena nentuka raban ketuai tauka ketuai ba sekula ulih ngangkatka program sekula nuju pelajar abad ke-21 enggau revolusyen industri 4.0.
Program pengelama tiga hari nya diatur ba Menara SEB sereta sekeda ari renggat latih industri GreEL ke alai pengajar diberi peluang nemuai, meda sereta mansik ejensi perintah bukai enggau ejensi korporat bukai.
Pengajar ke nyadi penyereta dalam program bekunsi penemu sereta forum ti dipejalaika SEB nya mungkur pejalai transformasyen serikat, tanggungpengawa rama korporat (CSR) enggau tikas penegut, digital enggau ke bukai nyengkaum nemuai ngagai palan perengkaguna serikat nya.