Anang guai nurun berikan maya gaya mua hari ke kabut sereta tasik ke begelumbang
MIRI: Orang berikan ditu dilalau anang guai nurun ke tasik dulu laban beratika gaya mua hari ke enda tentu lalu ditambah agi enggau puput angin ke bangat endar sereta tasik ke balat begelumbang maya tu.
Chairman Gerempung Orang Berikan Miri ( MFA), Musa Bujang madah beratika gaya trend mua hari diatu, manah agi orang berikan anang guai dulu nurun ke tasik lalu tu maya iya, sida iya miki jala sereta bot sida iya, datai ngagai maya tasik nya udah enda begelumbang agi.
“Anang guai dulu nurun berikan laban kabut enggau tasik ke begelumbang, lalu gaga meh pengawa bukai seraya nganti gaya mua hari ke manah agi,” ku Musa madah ngagai The Borneo Post kemari, berindik ari tasik di Miri enggau Sibuti dipadah balat begelumbang.
Ku Musa, kebuah nagang orang berikan laban enggai ke sida iya bisi napi sebarang penusah lebuh gaya mua hari baka kediatu ke tau jampat berubah, kabut sereta begelumbang.
Iya madah, orang berikan ulih matau gaya tasik nengah pemadah ke ditabur ulih Opis Meterogikal, TV enggau radio, datai ngagai gaya tasik nya nyadi normal baru.
Iya madah, naka kediatu bisi 1,000 lebih orang berikan bisi ngerijista sida iya empu enggau MFA ari sitak Kuala Baram ngagai Sibuti, nyengkaum ari Kampung Batu Satu Lutong, Piasau Utara, Kampung Pulau Melayu Miri, Kpg Bakam, Kpg Luak, Lusut, Kpg Peliau, Kpg Bungai enggau Kpg Kuala Sibuti.
Musa madahka manah agi bala orang berikan ngentu dulu di darat, lalu anang guai nurun ke tasik dalam gaya mua hari baka kediatu, datai ngagai mua hari udah manah mimit.
Dalam timpuh nya mega, iya madah orang berikan ke nurun ke tasik, dilalau madahka penunga sida iya ngagai sida sebilik.
Iya madah, tu laban kena beratika maya bisi penusah, sida iya ulih digiga lalu sida sebilik pan nemu penunga sida iya nyema maya penusah nyadi.
“Sida ke berikan lebuh nurun ke tasik, bekaling nurun tauka mayuh agi tubuh, ngambika enti perau sebuah bisi napi penanggul, perau ke bukai ulih mantu,” ku iya.
Dalam timpuh nya mega, iya madah, sida ke berikan tau mai perenga guna pengelikun nyengkaum lampu pichit, jaket pengelikun, ai, ruti enggau talipaun binching.