Sarawak nagit nyadi champion SUKMA 2018
KUCHING: Sarawak nagit teulihka semua midul emas ba main tenpin boling dalam Sukan Malaysia (SUKMA) 2018 di Perak kena 12 ngagai 22 September tu.
Menteri Dagang Temuai, Seni, Main asal, Nembiak enggau Lumba enggau Main, Datuk Abdul Karim Rahman Hamzah madahka nya juluk besai kontinjen kelimpah ari nagit deka ngulihka 77 midul emas enggau nyadi champion SUKMA 2018.
Nitih ku iya Sarawak ngambi bagi ba semua 29 acara ti dipekitka ba SUKMA 2018, ti nganjung urung 700 iku atlet sereta bala pegawai.
“Juluk kitai ba SUKMA 2018 deka ngulihka 77 midul emas.
“Siti main kitai ti pemadu kering iya nya tenpin boling. SUKMA ke sebedau tu kitai menang midul emas ba semua 11 main tenpin boling.
“Nambahka nya kitai mega kering sereta ulih meri empas ke balat ba main teakwando, angkat berat, silat, wushu, golf sereta ke bukai,” ku iya dalam aum pengarang berita lebuh ditanya juluk Sarawak dalam SUKMA 2018.
Dulu ari nya Abdul Karim nerima penemuai basa ari pengatur Pesta Tasik Biru Bau 2018 ba opis iya di Bangunan Baitul Makmur ditu, kemari.
“Juluk kitai amat besai, kitai deka nyadi champion SUKMA 2018, laban ba SUKMA ke sebedau tu kitai enda mujur tang aku arap bendar enggau chara kitai nyikap diri, kitai ulih nyadi champion,” ku iya.
Nandu baru, Abdul Karim madahka diri arap bendar kontinjen Sarawak ulih tejapaika juluk berindik ari mayuh latih udah dipejalaika nyengkaum bala atlit dianjung belatih ke menua luar baka ke China, Thailand, Sabah enggau Kanada.
Kelimpah ari nya, iya madahka SUKMA sebengkah lumba enggau main ke endur tetiap nengeri nempa lebih mayuh atlit kelimpah ari ti nyadi pengatur SUKMA.
Laban ku iya, enti udah nyadi pengatur SUKMA reti nya sesebuah nengeri nya udah ngembuan kereban lumba enggau main ti chukup, dibandingka enggau dulu suba.
Nitihku Abdul Karim, Kepala Menteri Datuk Patinggi Abang Johari Tun Openg deka nyuak menira ngagai ketuai kontijen iya nya Menteri Muda Nembiak enggau Lumba enggau Main Datuk Snowdan Lawan kena 8 September tu, pukul 2 lemai ba Hotel Century.
YAB Kepala Menteri mega bisi betemu enggau atlit di Ipoh kena 17 September lalu merarau enggau atlet kelimpah ari datai ngagai sekeda endur lumba enggau main dipekitka sebedau pulai baru ke Sarawak, ku Abdul Karim.