Anang beambi ulih nikika rega barang ketegal SST diterit
SARIKEI: Orang ti bedagang dilalau anang beambi ulih ari pengawa neritka Chukai Jual Engagu Servia (SST) ke berengkah 1 September tu tadi, sereta bedalih nikika rega barang.
Opis Menteri Dagang Enggau Pekara Bebeli Barang (KPDNHEP), Jenny Teron nangkan atur terit baka ti udah ditetap di baruh Akta Kawalan Harga dan Pencatutan 2011 deka dipejalai ngagai bala pedagang ti ditemu nikika rega barang.
Taja pia, iya lantang ati beratika nadai salah pengawa dikereja bala pedagang menua tu bekaul enggau pengawa bejalaika STT naka diatu, ku Jenny madah rambau aum pengarang berita, pengudah iya nguluka raban opis bejalaika operasyen ba Pasar Sarikei pagi kemari.
Kemari, operasyen ke diberi nama ‘Operasi Bersepadu Ops Catutan 5.0’ (SST) ke mega ngaul raban pemesai ari Opis Kastam enggau Kaunsil Pe- lilih Sarikei meresa beberapa rumah kedai di sepanjai Jalai Masjid Lama ti mungkur kedai Watson, Singapore Chicken Rice, 99 Teleshop, Ung Telecommunication, 7 Eleven Sdn. Bhd. enggau 1 Malaysia Café.
Operasyen nya tampung ari operasyen pra- SST ti dipejalaika sida dalam bulan Ogos nyin tadi ke matau rega barang enggau servis ba timpuh tumu pengudah bejalaika sistem chukai baru,” ku iya nerang.
Ku iya, sekalika sida nemu bisi nurun tauka niki rega barang naka ke diatu, seraya nambah, tebal agi pedagang agi ngetanka rega renchit lama laban sida nyual stok lama ngena rega GST.
Ba kandang diatu, sida nerima penerang ari pedagang, tang dalih baka nya enda entu engkeman dudi hari, ku iya nambah.
Tim penerit adat KPDNHEP mega deka seruran ngatur operasyen ke sama ba kandang menua pesisir, ku iya.