Siku pesakit strok nerima bantu ari PERKESO

MIRI: Siku pesakit mati tubuh sepiak tauka strok ke ari baruh bungkur Skim Pinchin Timpang Pendiau Gerempung Pengelikun Sosial (PERKESO) Pampang Miri.

Menijar PERKESO Miri, Griffin Francis madahka raban sida udah nerima peminta Pinchin Timpang Pendiau ari iya ti minta lalu meresa silik ngenukuka pematut iya.

Pia mega ku iya, ari pematut dipeda di baruh Skim Pinchin Timpang Pendiau beratika iya udah tetangkupka atur pematut umur enggau bayar nya.

“Lebuh gerah Timpang Pendiau sereta enda ulih gawa diterima, umur iya nya 46 taun iya nya baruh ari 60 taun lalu ari baruh atur pematut mayar mandangka iya udah mayar 1/3 ari pun haribulan mayar kenyau ari Januari 1990 nyentuk April 2003,” ku iya ditu, kemari. Ku Griffin, peminta pinchin timpang pendiau nya mega udah ditanya ngagai bala lutur di Miri kena 15 Ogos tu tadi lalu udah dituku ngidap timpang pendiau ketegal strok.

“Kelimpah ari nerima pinchin ninting bulan seumur idup, iya mega patut nerima elawin intu belama RM500 ninting bulan laban begunaka orang ngibun enggau ngintu idup iya besesehari,” ku iya nerang.

Kelimpah ari nya, pesakit tu mega deka patut nerima bayar berubat baka kereban berubat baka tiub angin, tilam hilo, kerusi roda, perengkaguna commade, ampin orang tuai enggau susu ensure.

Nangkanka nya, pesakit mega deka nerima fisioterapi baka ti diasuh panel raban lutur.

“Tu iya nya sebagi ari pemaik ti deka diterima ari mayar PERKESO enti sema sida dituntung penusah ba tubuh diri empu sebedau umur manggai 60 taun,” ku iya madah nyemetak.

Iya nerangka di baruh Skim Pinchin Timpang Pendiau nyendiaka Jaga 24 jam ngagai orang ti bisi insuran ngagai timpang pendiau ketegal sakit raya tauka balat bakal.

“Taja sida udah lama ngetu mayar tang enti bisi nyadi penusah timpang pendiau enggau iya diripot jampat ngagai PERKESO, raban kitai deka terus mantu enggau meresa sida sekalika patut nerima tauka enda,” ku iya nerang.

Bayar pampas ngaul bemacham kes ti ngaul pemati tauka timpang pendiau ngagai orang ti mayar ari baruh umur 60 taun.

Tu nyengkaum timpang pendiau, bantu ngintu bangkai, timpang pendiau mendam enggau enda, ilat enggau bantu timpang pendiau, pinchin udah pemati enggau pemaik ngagai orang ditanggung iya.

Pengawa nyuaka bantu dipenyadika Kaban Parlimen (MP) Miri, Dr Michael Teo enggau Direktor PERKESO Miri, Philip Sangkan.

NGELEMPUNGKA TATING PENUSAH: Teo (kiba) seraya dikemata Philip (dua kiba) nyuaka bantu ngagai orang ke nampung ruang bilik lebuh Skuad Prihatin PERKESO nemuai di rumah pesakit ti minta pinchin timpang pendiau apin lama ke udah.