PKR nadai penanggul menang ba PRN ti deka datai

KUCHING: Menang 18 ari 82 sitak Kunsil Nengeri (DUN) ba pengawa Bepilih Nengeri Ke-12 (PRN12) ukai pekara ti pedis tauka enda ulih ba Parti Keadilan Rakyat (PKR).

Kebuah pia ku siku penganalisis politik, Dr Saudi Narani madahka PKR majak tegap kenyau dua dekad ke udah.

Nambahka nya ku iya, penatai PKR di Sarawak diasaika semua pengundi sekalika di mengeri tauka di menua pesisir sereta kelimpah ari nyadi parti pupu bansa.

“PKR menang 18 ari 82 sitak DUN ba PRN 2021 ukai pekara ti enda ulih dijapai enggau gaya politik ke diatu sereta sentimen rayat enda berubah.

“Ditambah enggau Menteri Besai baru ari PKR (Datuk Seri Anwar Ibrahim), deka meri tikas pechaya rayat ngagai chara ngatur perintah ti baru,” ku iya madah ngagai Utusan Borneo kemari.

Saudi madahka PKR ti kering kenyau ditumbuhka udah mai ubah besai dalam gaya politik menua sereya nya deka mai ‘vox populi’ (suara rakyat) nengah iring enggau rebak baru kaban politik nya.

Nambahka nya ku iya, nyadi parti politik ari Semenajung Malaysia ukai isu laban pekara ti pemadu beguna iya nya ngemeratka rayat, ngaga servis enggau nadai bechiping, sensitif enggau seruran meri respon ngagai pekara ke diguna rayat.

“Taja pan bisi parti politik ari Sarawk, (tetap) kurang peneleba ti dalam tebal agi kes bisi isu bekaul pematut ngagai iring enggau penuduk, nya semina ngenataika pengerugi.

“Kelimpah ari nya, enda muntang sereta murah numbuhka parti politik baru, nama agi nyema diterenak enggau ditanka,” ku iya.

Saudi taja pan arap bendar, Gabungan Parti sarawak (GPS) enda deka ‘meri jalai muntang’ tang enggau naka ulih ngetanka pemayuh ke ulih sitak ba PRN12 ila.

Nitihku iya, pemutus ti enda manah ba Pengawa bepilih Besai Ke-14 (PRU14) apin lama, udah tentu ulih meri ajar ngagai GPS.

“Kitai enda ulih enda ngingatka, ex- perintah BN (Barisan Nasional) bisi mayuh legasyen dalam aspek pemansang enggau projek infrastruktur, ngangkatka tikas idup rayat menua pesisir sereta mayuh ari pekara manah ke ngasuh rayat enda mudahka ngelupaka nya.

“Nya alai ba aku, GPS biai peluang ti sama manah ngetanka perintah nengeri (ba PRN12) ila,” ku iya.

Iya madahka GPS bisi pengelebih besemekih dibandingka enggau parti politik bukai sereta ubah besai ulih nyadi nyema darah biak diasuh bediri minta pilih PRN12 ke deka datai.

Iya mansutka pekara nya dikena ngenang penerang chalun Sapit Presiden PKR Mohd Rafizi ramli ti madahka parti nya nagit menang ba 18 sitak DUN ba PRN12 ke ditimpuhka 2021.

Ku iya, juluk nya deka ulih dijapai enggau penyikap ti manah ari parti dalam timpih dua taun tu.

“Presiden PKR Datuk Seri Anwar Ibrahim deka dichirika nyadi Menteri Besai kelapan enggau PKR iya nya parti pemadu manah endur bala bakih kitai mai isu bekaul enggau peminta hak nengeri tu,” ku iya.

Rafizi mansutka pekara nya lebuh bejaku ba Program #Reformasi 20 Tahun ba sebuah hotel ditu Hari Minggu tu tadi.