Spesies asal Orang Utan di Sarawak patut diintu enggau manah
KUCHING: Sebengkah chara ti engkeman patut dipejalaika dikena ngetan sereta nentuka spesies asal Orang Utan ba nengeri tu, lebih agi bekaul pengawa deka mai tama spesies champur (kacukan).
Pakar Taksonomi Jabatan Hutan Sarawak, Dr Hatta Ramlee madahka, pengawa ngulaika pendiau spesies champur enggau spesies asal ke bisi ba Borneo tu deka ngeruga pemayuh spesies asal.
Nya alai pengawa mai tama spesies champur primat Pongo Pygmaeus Pygmaeus (Sarawak) enggau Pongo Pygmaeus Morio (Sabah) enda patut nyadi, ku iya.
“Ngulaika pendiau spesies champur Orang Utan nya semina deka ngeruga pemayuh spesies ke endang udah bisi.
“Empas timpuh panjai mega deka ngujungka spesies asal lebih agi ba nengeri tu deka punas.
“Empas ti enda manah ke nyengenda, spesies champur tu enda ulih ngadaka anak, nya alai peturun spesies nya naka nya aja, sereta nya bebida enggau spesies asal,” ku iya nengah siti penerang ditu.
Sebedau tu, Bernama kala ngeriputka dua iku Orang Utan ti diinjauka ngagai Yayasan Pulau Orang Utan Bukit Merah (YPOUBM) kenyau 18 taun ke udah deka dipulaika baru ngagai Sarawak Forestry Corporation (SFC).
Taja pia dua iku ke dijaga ti diberi nama Ah Ling enggau Carlos ukai Orang Utan asal ke dijali ulih Sarawak, tang kebendar dipelabaka ari Sabah tauka ari purih spesies champur.
Ku Hatta taja pan ari pemayuh ke dibai tama mimit tang ulih meri pangka dalam timpuh ti panjai.
Ari dua iku ku iya, ulih nyadi mayuh lebuh begulai enggau spesies asal.
Bepelasarka ripot berita Utusan Borneo sebedau tu dalam bulan Julai, Menteri Muda Perambu Mengeri, Pengatur Tanah enggau Rampa Menua Datu Len Talif Salleh ti mega nyadi Chairman Sarawak Forestry Corporation Sdn Bhd. ngulu Majlis Penyerahan Pemulangan Orang Utan ke Sarawak ti dipejalaika enggau simbolik ba sebengkah pengerami.
Pengerami nya diatur ba Dewan Toman, bukit Merah Laketown Resort di Perak ti dipejalaika ulih Chairman Yayasan Pulau Orang Utan Bukit Merah (YPOUBM) TanSri Mustapha Kamal Abdu Bakar sereya dikemataka Menteri Besai Tun dr Mahathir Mohamad.