PPH nentuka program nyikap diri napi penusah ngenyit diatur enggau manah
LIMBANG: Pengurusan Pangkalan Hadapan (PPH) ti datai ari ejensi perintah, volunteer, raban nyaga pengelikun enggau genturung pendiau menggi tanggungpengawa besai nentuka atur pengawa enggau program nyendiaka diri napi penusah bah diatur memanah enggau sikar.
Menteri Muda Pengelantang Komuniti Datuk Francis Harden Hollis madahka sida mega patut ngenegap enggau ngerapitka agi kaul kerejasama ejensi perintah, peribit, gerempung volunteer pengelantang, bala ketuai menua nya enggau komuniti ba pengawa mutarka penusah ngenyit.
“Pia mega sida patut seruran ngadang diri, nyikap diri iya nya bepenau ngadang chara mutarka penusah maya penusah ngenyit nyadi,” ku iya rambau Latih enggau Simulasyen Raban PPH Renggat Bagi Menua Limbang di Balai Raya Kampung Telahak apin lama ke udah.
Program tu diatur Opis Pengintu Pengelantang Raban Bansa Bagi Menua (PKMB) Limbang enggau kerejasama Pampang Raban Ngatur Pekara Bantu Penusah Ngenyit, Opis Pengintu Pengelantang Raban Bansa (JKM) Sarawak.
Ku Harden, latih enggau simulasyen nya beguna amat ngambika sida ti gawa enggau raban volunteer JKM ngatur randau, bekunsika penemu, peneleba enggau pengelandik dikena nambahka penemu ba pangku pengawa.
“Latih enggau simulasyen tu mega ulih meri penerang pangku pengawa enggau tanggungpengawa PKMB Limbang enggau komuniti menua nya bekaul enggau pejalai Raban Ngatur Pengawa Rintai Mua nentuka iya ulih dipejalai enggau meruan, sikar sereta berurun iya nya sebedau, maya enggau pengusah bah nitihka lalau Raban Ngatur Pengawa Rintai Mua,” ku iya madah.
Sama bisi datai Kaban Parlimen (MP) Limbang Hasbi Habibollah, Residen Limbang Ir Ahmad Denny Ahmad Fauzi, pengari Pemangku Direktor JKMS Harry Silas enggau Ketuai kampung Telahak Saadan Mohidin.