60 iku diri sebilik kaban SEC udah ngatur konvoi Hari Kebangsaan Ke-61
SEMATAN: Bisi 60 iku diri sebilik kaban Sarawak Exorian Crew (SEC) bejalai bebala mayuh tauka konvoi nyerumba ngintu Hari Kebangsaan Ke-61, apin lama.
Nitihku Ketuai Zon SEC Kuching, Zulkiflee Sebli, Konvoi Merdeka nya dipasuk 13 buah kereta kaban kelab nya, ti berengkah bejalai ari Moyan Square nuju Telok Melano, Sematan.
“Kebendar iya penemu tauka runding konvoi tu diperambu Julia Japar, kaban indu tunggal SEC ti chukup regas dalam semua aktiviti ke dipejalaika SEC ngelama tu.
“Perambu iya nerima tim- bal positif ari kaban SEC lalu numbuhka komiti program.
“Lalu aku mega arap bendar konvoi tu mujur sereta ngempuruka diri sebilik nyereta konvoi tu,” ku iya madah ngagai Utusan Borneo.
Berebak enggau tu Julia madahka pengaga ati diri ulih gempuru enggau bala diri sebilik dalam SEC kelimpah ari ngerapitka kaul.
Julia mega nesau orang ke bisi perengka pengakut Exo- ra ke bedau nyadi kaban SEC patut ngerejista diri awakka ulih sama enggau bejalaika aktiviti ke diperambu.
“Aku ke nyadi kaban indu dalam kelab tu, ngarapka lebih mayuh ari orang indu nyereta program ke diatur dikena ngerapitka kaul kitai,” ku Julia.
Entara program ke bisi datur sepemajai dua malam tiga hari di Telok Melano baka nginti, karaoke, sukaneka, manggang, sereta meri perais ngagai kaban SEC ke baru jadi melaki bini kelimpah ari bajalaika aktiviti neresa kampung.
Dulu ari nya Zulkiflee lebuh ditanya bekaul enggau pengerami ngintu Hari Kebangsaan tauka Kemerdekaan di mengeri Kuching, iya madahka, 31 Ogos tetap diintu taja pan mayuh piak ti madah nya ukai hari bulan merdeka nengeri.
Iya madahka 31 Ogos tetap disambut laban kenyau ari tadika sereta sekula primary, sejarah tauka pekara bekaul enggau 31 Ogos nya diterangka Malaysia merdeka.
“Ari segi penyedar ba rayat pasal kemerdekaan tu agi kurang. Tang ba sekula mantar medeka endang disambut nyentuk ngagai pengawa nutup bulan merdeka, dibandingka enggau ba genturung pendiau sereta penyedar ba raban bansa,” ku iya lebuh dipinta ngenang pekara nya.