Sarawak nagit beresi ari penyakit rabies dalam timpuh tiga taun
KUCHING: Juluk Sarawak ambis kurang tiga (3) taun deka ngenukuka Sarawak nadai agi penyakit ukui gila tauka rabies.
Sapit Kepala Menteri, Datuk Amar Douglas Uggah Embas madahka, nya alai begunaka kerejasama ari mensia mayuh kelebih agi Gerempung Ukai Dikuasa Perintah (NGO) awakka ulih nyapai juluk nya.
“Isu kitai diatu, kitai deka nentuka rabies ulih ditagang.
“Juluk kitai ambis kurang dalam tiga (3) taun endur ngenukuka Sarawak nadai agi rabies.
“Nya kebuah kitai begunaka kerejasama enggau duruk ari semua orang lebih agi NGO,” ku iya lebuh dikerandau raban pengarang berita.
Uggah ti mega Chairman Komiti Mutarka Penusah Ngenyit Sarawak (JPBNS), mansutka pekara nya lebuh ditanya bekaul enggau rabies ke nyadi ba nengeri tu.
Dulu ari nya Uggah bejadika International Catholic Committee of Nurses and Medical Social Assistants (CICIAMS) XX World Congress, ti ngena rambai jaku ‘Education for Sustainable Health: Engaging Development, Respecting Life’ ke diatur ba sebuah hotel ditu, kemari.
Bejaku baru iya madahka perintah nengeri nengah komiti ngatur mayuh bengkah program sereta pemansang dikena napi sereta munaska rabies.
Iya madah, enggau pengerembai penyakit nya, pengelikun mensia mayuh enda tau enda dikemeratka enti enda nya ulih meri penanggul kelimpah ari rayat ulih nyalahka perintah laban enda bejalaika atur ke patut.
Ditanya sekalika bisi SOP baru bekaul enggau isu, iya madahka SOP ke udah bisi tetap dikena sereta SOP nya dititihka piak baka Opis Servis Veterinar Sarawak.
Nambahka nya, Menteri Betanam Betupi Moden, Tanah Adat enggau Pemansang Kandang Menua nya madahka JPBNS sereta JPVS bisi kerejasama enggau duruk ari ejensi perintah sereta NGO baka Save Our Stray (SOS) enggau Serakup Nagang Pengasaar Nagai Jelu Sarawak (SSPCA) bejalaika program dikena nentuka rabies enda nyadi, kenyau ari bulan Julai taun nyin kemari.
Kelimpah ari nuchuk vaksin anti rabies, dikena nentuka penyakit rabies ari terus ngerekai, operasiyen nangkap ukui ba kandang endur dalam kategori chelum berengkah dipejalaika pun bulan September tu tadi di mengeri Kuching.
Taja pia Uggah madahka ukai semua kandang mengeri Kuching dipadahka ‘kandang endur chelum’ rabies laban ‘kandang endur chelum’ tu iya nya kandang endur ti mayuh sample positif rabies.
“SSPCA enggau SOS suah enggau tim kami. Program ti baka tu amat begunaka sukung ari opis tauka ejensi sereta kelebih agi NGO.
“Sida (SSPCA enggau SOS) mega meretika kebuah kitai ngereja nya dikena nentuka rabies nadai agi di Sarawak.
“Ba hari keterubah 1 September tu tadi, SSPCA enggau SOS mega bekerejasama sereta nuruk tim Majlis Bandaraya Kuching Selatan (MBKS) (bejalaika Operasyen Munaska Jelu Ke bekedayau ba kandang endur ke dikumbai ‘ kandang endur chelum’ rabies).
“Nya alai kerejasama tu manah amat lalu aku ngarap ulih dipajakka, kitai beguna amat ke sukung ari mensia mayuh, nyema bisi tetemuka kelai penyakit nya ba ukui, terus kenataika ngagai kami ngambika kami ulih bejalaika atur,” ku iya seraya minta mensia mayuh ngurung ukui dalam kandang rumah.
Lebuh ke ngenang pasal ripot sebengkah surat kabar ti mantaika berita ti enda sah madahka perintah kasar enggau jelu, Uggah madahka diri enda lantang ati laban berita ke ditulis pengarang berita surat kabar nya enda betul.
Iya ti udah meri penerang bekaul enggau ripot berita enda sah nya dalam surat kabar The Borneo Post, ngarapka media mantu nengah chara bisi tanggungpengawa sereta mantaika berita ti betul.