Menua endang ngemeranka atur demokrasi lalu perambu nya tentu bisi pemanah enggau pengelemi ungkup pemansang
KUCHING: Pengawa deka ngubah tikas umur ngundi ari 21 ngagai 18 taun patut dipansik silik ari sukut pemanah enggau pengelemi, sebedau iya dipejalaika.
Ketuai Raban Nembiak Parti Rakyat Bersatu (UPP), Dr Johnichal Rayong Ngipa madahka taja menua ngemeranka atur demokrasi sereta raban nembiak mega patut diberi peluang milih tuai menua, tang perambu nya tentu bisi pemanah enggau pengelemi.
“Raban nembiak endang diperansang meri penemu posistif dalam pemansang menua.
“Kitai endang meransang raban nembiak ngambika sama milih ketuai tauka perintah ti patut merintah menua
Tang aku meri perambu ngarapka pekara nya dipansik enggau lebih silik agi sebedau dipejalaika dipelabaka enda lama agi. Dr Johnichal Rayong Ngipa Ketuai Nembiak UPP
enggau nengeri laban kitai endang menua demokrasi ke alai rayat bisi hak sereta ulih meri penemu diri empu.
“Tang aku meri perambu ngarapka pekara nya dipansik enggau lebih silik agi sebedau dipejalaika dipelabaka enda lama agi,” ku iya.
Kaban Kunsil Nengeri (ADUN) Engkilili nya meri penemu iya dipinta Utusan Borneo meri penerang pasal kabinet besetuju ngubah Perlembagaan Persekutuan awakka ulih nurunka umur ke ulih ngundi ari 21 taun ngagai 18 taun.
Dalam riput surat berita apin lama, pekara nya dibantaika Menteri Nembiak enggau Lumba enggau Main Syed Saddiq Syed Abdul Rahman, ke alai iya madahka beguna jaku setuju dua pertiga Dewan Rakyat dikena nentuka ubah nya ulih dikemendarka.
Bejaku baru Rayong madahka raban nembiak ba tikas umur nya agi bepanggai ba apai indai lebuh ngaga pemutus dalam pengidup sida, lalu tebal agi sida agi besekula.
Nya alai, sekalika nembiak ba umur nya udah chukup tuai milih enggau betul tauka enda?, ku iya.