Tiga buah entukar bebadi ba KM 425 Jalai Betong-Sarikei
SARIKEI: Dua buah kerita enggau sebuah lori kargo dituntung penusah bebadi betampung ba Kilometer 425 Jalai Betong- Sarikei- Meradong, enda jauh ari simpang Selalang, ditu tengahari kemari.
Penusah tu dipelaba nyadi urung pukul 12 tengahari, maya ketetiga entukar nya dalam rantau jalai ke Kuching.
Penusah bepun nyadi maya sebuah kerita ngetu deka bekuing tama ngagai simpang Selalang tang kena lantak sebuah kerita pikap (4WD) ari belakang pengudah ke puntan nyeliah enggau nekan berik.
Bekau kena lantak ari belakang ngujungka kerita nya bekuing ke kiba jalai lalu kena lantang lori ke datai ari sepiak kiba.
Bisi dua lurung jalai ba palan penusah nya, bekau penusah nya ngujungka deriba kerita enggau deriba lori bisi bakal mimit, udah nya orang deriba 4WD nadai sebarang bakal.
Semua entukar ke bebadi nya udah dibai ngagai Indu Opis Polis Pelilih ( IPD) Sarikei.
Piak bomba ari Balai Bomba enggau Penyah Penusah Sarikei bisi ngesah palan penusah lalu meresi minyak ke naya. KUCHING: Kaban Parlimen santubong, Datuk Seri Wan Junaidi Tuanku Jaafar nyukung penuh penemu deka meri pulai baru status Sarawak enggau chara ngubah konstitusyen tauka nginsil undang-undang nyema patut.
Iya ti sepenemu enggau semua rayat nengeri tu madah nyadi kaban parlimen, iya besedia mantu enda ngira baka ni chara ke ulih dikena mulaika baru status Sarawak.
Taja pia nitihku Wan Junaidi, perintah Pakatan Harapan (PH) mesti ngayanka pengeran enggau komitmen sida sereta ukai semina retorik politik.
“Pekara pasal majoriti dua pertiga (2/3) perintah PH dalam parlimen, tu ulih ditapi sida iya enggau chaga ngatur runding, berandau enggau mayuh bengkah raban kaban parlimen.
“Tu laban majoriti besai madahka Sarawak enggau Sabah bisi hak ngambi baru enda ngira nama aja ke lenyau kenyau 55 taun ke udah.
“Nya alai, anang meri tegal agi,” ku Wan Junaidi lebuh ti ngenang pasal jamin Menteri Besai Tun Dr Mahathir Mohamad ti deka mulaika baru status Sarawak nyadi kaban sebaka dalam Perintah Besai Malaysia begulai enggau Sabah sereta Semenanjung Malaysia.
Dulu ari nya Wan Junaidi madahka ngelama tu, perintah besai udah ngaga pemutus nitihka penyenang diri ti dianggap patut, enda ngira sekalika polisi enggau undang-undang ti ditumbuhka dikena ngemuntangka tusun pengawa enggau menua tauka ngemenuh Atur Konvensyen Entrabansa, enggau nadai ngira pekara ti diungkupka dibaruh Perlembagaan Persekutauan enggau syarat-syarat dalam Sempekat Malaysia 1963(MA63).
“Lebuh sida numbuhk tauka ngaga undang-undang, sida jarang ngambi serius MA63 sereta pia mega Perlembagaan Persekutuan.
“Nya alai, sida semina meda nama ti disebut ulih luyar, empat sudut undang-undang nya empu sereta ukai meda ngagai atur konstitusyen pasal peminta tauka pematut berunding enggau berandau sereta minta pemendar menua baka Sarawak enggau Sabah sebedau rang undang-undang dibai ke parlimen,” ku iya.
Lebuh rang undang-undang dibantaika ba Parlimen, perintah deka nguna penuh kuasa ‘ whip’, pengurang kaban parlimen pasal undang-undang enggau nadai pemansik dikena ngelalau kaban parlimen.
Nya dikemeranka belama iya nya penyampau majoriti kaban parlimen dikena ngemendarka rang undangundang di dalam kededua dewan.
“Taja pan kaban parlimen bisi latar belakang undangundang, nadai dilalau sereta pemansik ke betul, sida engka enda ulih meretika implikasi undang- undang lebih agi pasal hak Sabah enggau Sarawak.
“Nya alai, sida betalat penemu pasal polisi enggau pangka silik undang-undang enggau enda peduli atur dalam pekat MA63 enggau Konstitusyen.
“Kenyau ari nya, kelalu mayuh polisi enggau undangundang ti ditumbuhka ulih perintah besai, ti ngelanggar syarat-syarat MA63 enggau Perlembagaan, dikemendarka ulih Parlimen enggau dipejalaika penuh ulih perintah besai,” ku iya.
Siti chunto ti manah iya Akta Pelantar Benua ti dikemendarka, ti ngurang adan menua Sarawak ti enda kala bulih pemendar rasmi ari perintah nengeri baka ti ditulis dalam Perlembagaan Persekutuan.
“Kitai bejalai bejalaika pemansik ti penuh pasal ngelanggar pekara bukai bekaul enggau Konstitusyen enggau MA63, ti mai ngagai pemendar akta-akta di dalam parlimen.
“Kitai enda nemu berapa pemayuh akta ti baka nya dikemendarka ulih Parlimen kenyau 55 taun ke udah,” ku iya seraya nambahka siti agi chunto manah iya nya pemendar akta ti ngubah Konstistusyen dikena ngurangka status Sarawak enggau Sabah ngagai nengeri dalam Malaysia, sereta ukai nyadi komponen baka ti dipesetuju maya penumbuh Malaysia di baruh ‘Perkara 1(2) Perlembagaan Persekutuan’.