Pekit ngerebut gelar Raja Sungai Batang Kayan bepun sehari tu
LUNDU: Pekit ngerebut gelar Raja Sungai Batang Kayan bepun sehari tu (Hari Enam) beserimbai enggau Regata Sungai Batang Kayan 2018.
Regata Lundu entara lumba besai ke bisi diatur nyerumba Pesta Lundu 2018 ke bepun kemari lalu deka tembu pagila (Hari Minggu) ba Tebing Lundu.
Urung 12 tim bisi ngambi bagi ngerebut perais ke bisi disedia penyampau RM30,000.
Ari penyampau nya, enam buah tim datai ari menua Lundu udah nya iya ke bukai datai ari Kuching, Kota Samarahan, Simunjan enggau Gedong.
Entara sida ke nyereta lumba tu iya nya Yayasan Sarawak, Puteri Kilat, Putera Gading (GP Lang), LANDAS, Nyolong Sakti, Buraq Terbang 1, Sinaran Ratu Balqis enggau Sinaran Ratu Siksa.
Pemesai Pelilih Lundu Awang Putrayusrie Awang Redzuan madah, Regata Lundu endang dianti-anti raban peminat lumba ai ke sigi udah tebilang ba peranak menua tu enggau temuai luar.
Kenu ku iya, ungkup lumba Sakai 30 Pekayuh Lelaki kepenudi, champion deka nerima perais duit RM4,000 enggau trofi lalu ditangkan lumur dua RM3,000 enggau lumur tiga RM2,000.
“Entara kategori bukai ke bisi diperebut iya nya Kategori tebuka Sakai Lelaki Tebuka (Sakai 10, Sakai 15, Sakai 20 enggau Sakai 30,” ku iya.
Kenu ku iya, pekit ke dipelaba balat matak penatai mensia mayuh iya nya Sakai 10 Indu Tebuka enggau Sakai 15 Bechampur.
Kelimpah nya, entara lumba ai bukai ke bisi diatur iya nya lumba bot laju 10 HP, 18 HP enggau 30 HP.
Berebak enggau nya, sekeda aktiviti bukai dikena ngerichahka Pesta Lundu taun tu iya nya perau berias, bemukun, street soccer, pekit muaythai, pekit dart, autoshow, festival kek bulan, panggau pemerindang, pekit karaoke, nginti, pengawa pemandang enggau bejual produk menua tu.