Sarawak enda ulih ngerembaika ekonomi enti semina bepanggai ba makit dalam menua tu aja, ku Abang Johari
KUCHING: Sarawak meseti ngerebut peluang ba makit besai baka makit di China ngambi ti ulih ngerembaika ekonomi kelimpah ari makit dalam menua, Ku Kepala Menteri Datuk Patinggi Abang Johari Tun Openg.
“China ukai semina menua ke ngembuan ekonomi ke besai, tang mega bisi makit besai ke tau dikerebut ekonomi mit baka Sarawak.
“Nadai jalai ungkup kitai di Sarawak ulih ngerembaika ekonomi enti semina bepanggai ba makit dalam menua aja.
“Kitai meseti ngerebut makit besai baka China,’ku iya ba pengerami ngintu genap 69 taun penumbuh Menua China di sebuah hotel ditu, malam ensanus.
Teks jaku iya dibacha Sapit Kepala Menteri Datuk Amar Douglas Uggah Embas.
Abang Johari ngakun Sarawak mengkang dibelakang ba pengawa ngemansutka produk pemakai.
“Tu mih potensial ti deka dikerebut Sarawak nengah program ubah pengawa betanam betupi.
“Kitai keran nambahka asil produk buah tropika baka ke ngemansut buah rian ke bekualiti ti ulih nangkup pinta makit menua China,’ku iya.
Iya mega madah Sarawak keran ngerebut makit dagang temuai ke besai ari China.
Iya madah udah suah nemuai ngagai China rambau mangku pengawa nyadi menteri dagang temuai sebedau nyadi Kepala Menteri Keenam.
“Tanggungpengawa aku ngelaku Sarawak nyadi palan dagang temuai di China.
“Aku pechaya Sarawak bisi mayuh palan pematak temuai ari China lalu kitai merambu ngemansang industri dagang temuai di Sarawak ngambi ulih nangkup makit dagang temuai ke besai ari China,’ku iya.
Iya madah diri gaga pengudah Konsulat Besai China di Kuching, Cheng Guangzhong udah nemuai ngagai mayuh kandang endur di Sarawak dalam timpuh enam bulan di nengeri tu.
Abang Johari nambah, bala imigran ari China ke datai ke Sarawak ba kurun ke 19 mai main asal enggau tradisyen lalu diatu udah diterima nyadi sebengkah main asal di nengeri tu.
“Diatu, peturun ari China ke ada di nengeri tu udah ngakun diri sida peranak Sarawak. Sida ukai agi dikumbai imigran.
“Sekeda engka bisi pulai ngagai tanah besai China ketegal ti deka betemu enggau kaban belayan tauka raun pia aja.
“Tang peranak Sarawak bebansa China tu tetap deka pulai ngagai Sarawak ketegal sida ngasai Sarawak tu mih rumah sida,’ku iya nambah.
Pengerami nya digulu Tuai Megai Menua( TYT) Tun Pehin Sri Abdul Taib Mahmud.
Bela datai bini uggah, Datin Amar Doreen Mayang enggau bini Cheng, Gao Cuilian.
China ukai semina menua ke ngembuan ekonomi ke besai, tang mega bisi makit besai ke tau dikerebut ekonomi mit baka Sarawak. Datuk Patinggi Abang Johari Tun Openg Kepala Menteri Sarawak