Seliahka pekara birokrasi ke pemujur program mantu orang bekebun

KUCHING: Pekara birokrasi entara perintah negeri enggau besai patut diseliah ngambi ulih nentuka program mantu orang bekebun di nengeri tu dikemujur, ku Menteri Betanam Betupi enggau enggau Industri Betanam Betupi Datuk Salahuddin Ayub.

Iya madah pekara nya udah dikerandau enggau Kepala Menteri Sarawak enggau Sapit Kepala Menteri ngambika ulih nyadi diplomat ke pemadu manah.

“Kelimpah kitai ti diberi mandat sereta bisi kuasa ba perintah besai enggau negeri, tanggungpengawa kitai iya nya nentuka tekul birokrasi diputar nengah semengat ke udah ayan ba konstistusyen menua enggau Sarawak.

“Ke pemadu berat iya nya raban orang bekebun teulihka pemaik ari kerejasama ke rat entara kededua perintah,’ku iya.

Salahuddin mansutka penerang nya ba aum pengarang berita pengudah ngulu sesi randau begulai enggau raban orang bekebun, berikan enggau betupi.

Randau ke diatur di di Balai Besai MPC di Demak Laut, Kuching nya kemari bela digulu Sapit Kepala Menteri Datuk Amar Douglas Uggah.

Iya nambah opis menteri diatu benung kiruh ngiga pengeraja asal baru ari pengawa betanam betupi ti tau mai penatai pemisi tambah ngagai orang bekebun.

Pengawa nanam buah nyiur, rian, nenas enggau asil ke bukai ku Salahuddin entara pekara ti dikemerat opis menteri.

“Kitai mega nerima komit- men ari perintah negeri ke alai enti pengawa nanam pengeraja asal baru tu enda chukup tanah, perintah negeri sanggup nyendiaka tanah,’ku iya.

Ngenang kaul ke sama, Uggah madah pengeran mantu orang bekebun di nengeri tu ulih dikemujur nengah kerejasama rat entara Kuala Lumpur enggau Kuching.

Ku iya, bisi 23 ejensi ke meri bantu ngagai orang bekebun, berikan enggau orang nupi jelu lalu bantu nya meseti datai ba sida.

“Juluk kitai iya nya ngangkatka ikas pengidup orang bekebun lalu program meseti datai ba sida,’ku Uggah.

Bela datai sapit Menteri dagang dalam Menua, Koperasi enggau Pekara Bebeli barang(KPDNKK) Chong Chieng Jen enggau Menteri Muda Betanam Betupi Dr Abdul Rahman Junaidi.