Muzium Ranee:Margaret of Sarawak berengkah sehari tu
KUCHING: Muzium Ranee: Margaret of Sarawak siti agi pematak temuai ke mengeri tu, ti dibuka ngagai mensia mayuh nyengkaum ari menua luar berengkah sehari tu (29 September).
Menteri Dagang Temuai, Seni, Main Asal, Nembiak enggau Lumba enggau Main, Datuk Abdul Karim Rahman Hamzah madahka diri gaga ati laban utai ke datai ari nengeri tu dibai pulai baru sereta dipandangka ngagai mensia mayuh ditu.
Iya madahka sehari kemari hari besejarah laban barang ti digumpul sereta diempu siku indu ti benama Margaret de Windt ke udah bejalaika pengawa besai dalam langgur nengeri tu suba dipandangka ba Muzium Ranee.
“Barang ke digumpul iya bisi dipandangka sehari tu, mai kitai mulaika pengingat, ke amat narit ba ati kitai.
“Ari tu kitai ulih meda pesaka Sarawak sereta aku beterima kasih ngagai The Brooke Trust laban ti udah mai sekeda barang tu pulai baru ke Sarawak, enti enda semina di menua UK aja.
“Tu (pesaka) pekara ke chukup semak ba ati rayat di Sarawak lebih agi ke diau ba Kuching,” ku iya.
Karim mansutka pekara nya lebuh dikerandau raban pengarang berita pengudah tembu bejadika Muzium Ranee: Margaret of Sarawak ti bepalan ba Kort Lama ditu, lemai kemari.
Iya madahka muzium nya ditumbuh sereta dibuka senipak enggau juluk perintah nengeri nengah opis menteri nya ke deka nyadika Kuching mengeri ti bisi jiwa(soul) sejarah.
“Tu nyadi siti palan ke ulih endur temuai datai, enti sida deka nemu mayuh pasal pesaka, deka nemu pasal sejarah Sarawak enggau Kuching, tu meh siti palan ti enda tau enda di lawa.
“Enti datai nemuai ngagai Fort Margherita, temuai tu mega tentu enda tau enda datai kitu (Muzium Ranee: Magaret of Sarawak).
Muzium tu muzium tetap baru ti narit ati ke mandangka pengidup tebilang legenda sereta legasi Margaret de Windt lebuh beumur 19 taun, iya belaki jadi enggau Rajah Kedua Sarawak ti lalu ngasaika pengidup baru nyadi permaisuri siti perintah ti ngemegahka ati, pengawa ti dikereja iya pengelama setengah abad.
Sarawak meri inspirasyen kreatif ngagai iya ke alai udah diayanka iya nengah utai dero, muzik, litricha enggau kraf.
Dikena iya meri pengaga ati ngagai pengelandik menua tu baka tenun songket enggau sulaman keringkam, asil kerja ti pemadu manah asil ari ke digumpul iya empu diatu ulih dikunsi sama.
Ba Muzium tu, kitai ulih nemu pejalai Margaret lebuh iya ngiga reti, tuju enggau identiti di Sarawak, pengudah enda diterima ba endur bukai.
Siti barang ke digumpul sereta diempu Margaret ke bisi dipandangka ba muzium tu iya nya sulaman keringkam. Lalu keringkam ke disanggit ungkup Ranee (permaisuri),ngayanka kaul rat iya enggau raban bansa ba menua tu.
Keringkam Sarawak iya nya tudung (skaf) pala asal ti dikena indu Melayu ba pengerami baka pengerami belaki bebini sereta keringkam nya chukup dikesayau laban disanggit ngena ubung emas tauka pirak sereta nyadi pesaka ke ditampung.
Nambahka nya baju Kebarong Ranee Margaret mega bisi dipandangka ba muzium tu.
“Iya (Margaret tu enda baka indu bukai, iya siku indu ti chukup kering ati. Ari gambar iya empu kitai ulih meda iya siku indu ti kering.
“Iya siku orang ti rinduka seni, nulis sereta ke bukai lalu nuan ulih meda sekeda di Sarawak, baka ni iya mansang ti ukai semina ba pasal ngatur pengawa politik.
“Engka enti nadai iya (Margaret) kitai nadai Astana baka ke dikemisi kitai sehari tu, enti nadai iya engka nadai Fort Margherita, laban Astana digaga laki iya ke iya, lalu Fort Margherita diberi nama iya,” ku Karim ngenang sekeda sejarah bekaul enggau Margaret.
Muzium Ranee: Margaret of Sarawak ti bepalan ba Kort Lama dibuka ngagai mensia mayuh ninting Hari Satu (Isnin) - Hari Minggu( Ahad) & Kemisi Belelak ari pukul 9 pagi ngagai 4.45 lemai.
Sama bisi datai kemari, Direktor The Brooke Trust, Jason Brooke; Sapit Sekretari Perintah Nengeri Dr Sabariah Putit, Ketuai Pemesai Eksekutif Kaunsil Dagang Temuai Sarawak, Sharzede Salleh Askor enggau ke bukai.