Karim tekenyit, palan projek Kampus Muzium dan Jejak Warisan S’wak nyadi sarang nyamuk aedes

KUCHING: Penyadi kes denggi ba projek Kampus Muzium dan Jejak Warisan Sarawak nengenyitka Menteri Dagang Temuai Seni, Main Asal, Nembiak enggau Lumba enggau Main Datuk Abdul Karim Rahman Hamzah.

Iya ti madahka diri nemu berita nya ari ripot surat kabar, dipadahka kandang endur projek nya mayuh uras ke dibuai sebarang endur ke ulih alai nyamuk betelu lalu bisi kes denggi nyadi ba endur nya.

Taja pia, pekara nya udah dikemeratka sereta kandang endur projek mega diberesi, ku iya.

“Aku kebendar iya tekenyit laban tu di puak mengeri. Tang tu ukai (kes) ti besai, agi ulih dijaga tauka ditagang,” ku iya lebuh dikerandau raban pengarang berita pasal kes nya, pengudah iya bejadika Muzium Ranee: Margaret of Sarawak ba Kort Lama ditu, kemari.

Tiga hari ke udah, Opis Pengerai Nengeri Sarawak minta palan projek Kampus Muzium dan Jejak Warisan Sarawak ditutup sementara ketegal bisi igi penyakit denggi.

Peminta nutup sementara nya nengah Opis Pengerai Bagi Menua Kuching, iya nya berengkah 21 September ngagai 28 September di baruh Seksyen 8(3)(a) Akta Pemusnahan Serangga pembawa Penyakit 1975 (Pindaan 2000).

Nengah penerang berita ditu, Direktor Opis Pengerai Nengeri Dr jamilah Hashim madahka igi penyakit denggi dipadahka bisi ba kandang endur nya pengudah bisi semilan kes renga denggi diripotka ari endur igi penyakit nya nyentuk 24 September.

Pengawa nutup sementara endur nya dikena meri peluang ngagai pemaju projek bejalaika kereja meresi enggau munaska endur nyamuk betelu sebedau dikemendarka dibuka baru.

Nitihka ripot berita sebedau tu, projek Kampus Muzium dan jejak Warisan Sarawak nya dianggarka berega RM308 juta sereta ditimpuhka tembu kena bulan Jun 2020.