Peranak ari baruh pegai SRDC dipinta bejejaga enggau pengelekai penyakit rabies
SIBU: Opis Kaunsil Pelilih Pesisir Sibu (SRDC) ngelalau peranak ke ari baruh kuasa opis nya ngambika bejejaga sereta ngambi atur ke patut laban igi penyakit majak ngelekai ngagai bagi menua nya.
Kena Hari Empat tu tadi, Komiti Mutarka Penusah Ngenyit Nengeri, madahka lima kandang menua baru ditukuka bisi rabies iya nya Jalai Teng Chin Hua di Sibu; Jalai Kilang ( Bintangor) Meradong ( Sarikei); Jalai Airport Lama (Kapit); Piasau Jaya (Miri) enggau Lutong Shell (Miri).
Berebak enggau tu, chairman kaunsil Sempurai Petrus Ngelai madah: “Kami ngelalau semua paranak ke ari baruh kuasa SRDC dipinta bejejaga sereta nentuka jelu tupi sida baka ukui dikandang ba laman rumah tauka dalam sangkar.
“Gaga ripot nyema bisi meda ukui ke bisi kelai kena penyakit rabies enggau naka penyampat. Nyemaka biisi mensia mayuh ke diketup ukui, patut dibai jampat berubat ngagai klinik ke besemak.”
Sempurai madah munyi tu kemari lebuh dipinta meri jaku tangkan ngagai peranak di Sibu Jaya enggau kandang endur bukai ke ari baruh kuasa SRDC ng ambika ulih nagang pengelekai penyakit rabies nya.
Menteri Muda Pengawa Berumah enggau Pengerai Mensia Mayuh, Dr Annuar Rapaee mega bisi ngelalau orang ti ngempu jelu tupi nya ngambika anang semina puas ati aja tang patut nentuka ukui sida dituchuk vaksin dikena ngelaban penyakit.
“Tentuka ukai kita dituchuk vaksin lalu kurung ukui nya ba laman rumah kita pengudah dituchuk.
“Program vaksin anti-rabies majak dipejalaika lalu kami begunaka sukung ari mensia mayuh ngelaban igi penyakit rabies tu,” ku Dr Annuar, ke mega ketuai Komiti Nagang Penyakit Rabies Sibu,ngelalau.
Renggat ketiga program nuchuk vaksin anti-rabies ke enda bebayar nengah chara besai tu udah dipejalaika di Bagi Menua Sibu berengkah ari 19 Sept nyentuk 2 Nov.
Bisi 284 iku ukui udah ngalih hari.