Program ‘pemutihan’ deka dipejalaika ba orang berikan

KUCHING: Menteri Bumai enggau Industri Betanam Betupi Datuk Salahuddin Ayub madah program ‘pemutihan’ deka digaga ba rintai nama orang berikan di menua tu.

Ku iya, program ‘pemutihan’ nya deka nentuka bantu ke disedia opis menteri amat diterima orang berikan lalu enda nuju orang bukai ke nadai kaul enggau pengawa berikan.

“Program tu ulih nyeliah pengawa sida ke nipu ti deka ngulihka bantu ari program bantu ungkup orang berikan.

“Naka ke diatu, definisyen orang berikan iya nya orang ke ngereja pengawa berikan baikka di sungai tauka ditasik ungkup timpuh 120 hari dalam timpuh setaun.

“Raban tu dirijista lalu patut nerima elawin penyanding pengidup sereta bantu bukai baka ke diesel enggau petrol,’ku iya.

Salahuddin mansutka jaku nya lebuh nyaut tanya orang berikan ari Asajaya ba sesi randau ke diatur di Balai MPC, Demak Laut ditu, kemari.

Ku iya nambah, raban pemesai ari opis menteri deka ngaga pansik lalu ngemujur program ‘pemutihan’ nya.

“Aku ngarap raban ketuai bansa di tetiap genturung pendiau ulih mantu ketegal sida ke lebih ngelala orang berikan ba kandang endur ke dipegai sida,’tandu Salahuddin.

Ngenang kaul ke sama, iya madah elawin penyanding pengidup ungkup orang berikan tetap deka disambung perintah baru Pakatan Harapan(PH).

“Naka jam tu, elawin penyanding pengidup ungkup orang berikan mengkang diberi ke alai aku udah ngaga pemutus,’ku iya.