Parti Rakyat Bersatu meruan nyukung KM ngiring nengeri Sarawak
ENGKILILI: Parti Rakyat Bersatu ( UPP) sekali agi madahka sukung 100 peratus ngagai Kepala Menteri (KM) Datuk Patinggi Abang Johari Tun Openg dalam ngiring nengeri Sarawak.
Bejaku ngagai Utusan Borneo nyerumba pengawa bejalai beraban Tanglung di pasar Engkilili apin lama ke udah, Ketuai Nembiak UPP Dr Johnical Rayong Ngipa nyemetak madah, bepuluh ribu kaban parti nya ba selampur nengeri begulai enggau ketuai renggat tinggi enggau sayap parti besemata bediri tegap begulai enggau perintah nengeri lebih agi negika pemaik, pengandal enggau hak rayat Sarawak.
“Berebak enggau ansak ke digaga parti sepiak lebih agi ke bepengkalan ba Semenanjung (Malaysia) ngagai Abang Johari, kami begulai enggau semua komiti sereta penyukung parti UPP deka ngetanka iya enggau naka ulih...mimit pan enda takut sereta ngerika keruga piak luar,” ku iya.
Ku iya, jaku keruga ke dituju ngagai Abang Johari nengah laman media rama Facebook apin lama ke udah mandangka bisi piak enda lantang ati enggau pengeran iya negika hak Sarawak lebih agi sentang MA63 sereta Ordinan MInyak enggau Gis enggau baka ke baka tu enda patut dilak pia aja.
“Nya alai, kami ke nyadi sebuah parti ari nengeri tu empu ngembuan mayuh kaban ba serata nengeri enggau lebih 28 pampang sigi enda ngelakka Kepala Menteri kediri napi keruga nya lalu deka meda piak ke ngereja pengawa nya digiga nyentu temu” ku iya.
Kenu ku Kaban Kunsil Nengeri (ADUN) Engkilili nya mega, Kepala Menteri enggau raban kabinet iya ba jalai ke betul ngeringka hak Sarawak nyengkaum isu bayar royalti minyak 20 peratus laban jak nya endang patut diberi tang enda dikeibuh ukai setaun dua tang pengelama 55 taun.
“Nya alai, kitai ngasaika endang patut piak sida nyin ngamatka semaya enggau juluk ke tinggi rayat nengeri tu lebih agi perintah PH ke madah diri nemu peneka rayat,” ku iya.
“Ba kitai, chukup mih perintah besai ngaga kitai baka anak iru sereta ngerampas hak Sarawak ke udah dipekat dalam dokumen MA63 sereta asil minyak enggau gis laban timpuh 55 taun chukup lama deka dikeamat, ku iya seraya madah pemeri ke adil patut diasaika Sarawak laban nengeri tu enda kala masuk Malaysia tang kebendar nyadi siti ari menua ke begulai numbuhka Malaysia lebih 60 taun ke udah.
Berebak enggau nya, Dr Rayong madah semina parti dalam memua tu empu nemu sentimen enggau pengadang ke tinggi lebih agi rayat ba menua pesisir ke agi ngarapka penyinu perintah nengeri ngatur pemansang.
“Rayat Sarawak enda tentu kiruh pasal berapa bilion utang menua, sapa ditangkap tauka merejuk parti tang iya nyata sida deka nemu nama utai ke ulih diberi perintah dikena ngelempungka tating belanja baka nurunka rega barang enggau minyak, bukai jalai raya ke manah, bekal ai enggau karan kelimpah bekaul enggau pengidup besehari-sehari.
“Nya alai, kitai ngansak perintah besai lengkas ngamatka semaya meri royalti 20 peratus ngagai Sarawak baka ke udah bisi dalam manifesto PH maya kimpin sebedau tu,” ku iya seraya madah duit nya ila deka dikena melanja semua projek menua pesisir ba nengeri tu.
Dulu ari nya, pengaw abejalai beraban Tanglung ba pasar Engkilili diatur nyerumba Kuih Bulan serak tu dikemataka urung 3,000 iku orang lalu iya diasaika pemadu besai enggau chukup rami kenyau iya udah diatur ditu.
Ngelansa pasal pengerami nya, iya madah nya deka nyadi pelasar pemadu manah penyerakup bansa laban nengah pengawa nya iya bisi dipasuk ukai semina bansa China tang mega bisi bansa bukai bala Iban enggau Melayu.
“Kitai ngarap pengawa bejalai beraban taun siti nyin ila deka besai agi ari taun tu lalu aku minta aktiviti tu dipasuk dalam kalendar dagang temuai nemngeri tu lebih agi ba pasar Engkilili,” ku iya.
Bela nyereta pengawa tu iya nya pengari opis-opis perintah, pengari opis perintah ba Engkilili, penghulu, bala kaunselor, kapitan, tuai-tuai rumah sereta mensia mayuh ke besemak.