Hari gempuru diri sebilik Kelab Raban Iban Sebelak (KRIS) 2018 pelasar ngerapitka kaul enggau pangan diri
KUCHING: Kelab Raban Iban Sebelak ti tebilang agi disebut ngena akronim (KRIS) tu siti kelab ti formal lalu udah direjista ba Opis Ngerejista Gerempung (ROS) kena 28 November 2016 suba. KRIS ngembuan kuing tuju ti nyengala, bebatang sereta menuku.
Siti ari tuju ti dikenatika KRIS nya ngimpun sereta ngempung bala perayat ari Sebelak ke ngani diau enggau gawa di Bandaraya Kuching, di Pelilih Samarahan enggau di Pelilih Menua Serian. Kelimpah ari nya, KRIS mega nyeridi sereta menatika pemujur, pengelantang pendiau, pengelikun enggau pemaik bala diri sekaban belayan dalam semua aspek, baik ke dalam aspek pelajar sekula, penatai pemisi, rekreasyen enggau sosial, main asal, daya idup enggau mayuh mega ti bukai. Taja pan penumbuh KRIS tu agi puda, agi biak tang sida endang udah chakah merambu, ngatur lalu bejalaika program enggau aktiviti.
Nyadi kena 22 September 2018 tu tadi, KRIS udah mujur ngatur Hari Gempuru Diri Sebilik KRIS 2018 ba siti palan pengelantang ati di Koloyan River Cottage, Bau. Pengerami tu apin lama udah mujur ngimpun lalu ngempuruka lebih seratus iku bala kaban kelab.
Sama bisi datai ngulu pengerami tu mega nya bala Penyanding Penemu KRIS, YBhg. Datu Michael Dawi Alli, Ketuai Pengerejiista Kort Bumiputera, Mr. Angat Anum Lingoh, Managing Direktor Expro Marine Sdn. Bhd enggau Mr. Patrick Chaong Rangga, ex Pemantu Sekretari Prinsipal ba Opis Menteri Rampa Menua enggau Pen gerai Mensia Mayuh.
Pengawa sida iya sebuat ke pagi nya dulu dipungkal enggau atur besembiang ti diuluka Lay Reader Julis Janting.
Mr. Sylvester Rangga ke nyadi Tuai Rumah tauka Chairman KRIS dalam jaku pengelalu iya, madahka KRIS enggau naka ulih deka nyapai juluk ati, kuing tuju seraris enggau tuju penumbuh KRIS. Iya ngengkang madahka komiti KRIS agi meras enggau juluk ati ti deka numbuhka koperasi dikena ngerembaika sosio ekonomi. Kelimpah ari nya, sida mega bisi langgur penemu deka ngiga tanah alai ngentakka rumah panjai ba pesisir mengeri Kuching ngambi ke nyamai alai nembiak ke rebak dudi ila ngatur lalu bejalaika program enggau aktiviti kelab ke jemah ila.
Beserimbai enggau pengerami tu, bala komiti udah mujur ngatur program bekunsi sambil nerenakka pengelandik enggau peneleba ngagai bala nembiak rebak baru nengkiraka pengawa baka mansuh asi pulut, lauk baka ikan enggau dagin, mutung jelu, ngelampang enggau netak dagin, ngerempan upa, manduk lauk stail tradisional enggau sekeda agi pengawa ti bukai. Sida sebuat sama gagit ngansingka penyikar enggau pementas diri ngereja pengawa seraya ke begauk enggau besulu pangan diri.
Maya tu mega, komiti bisi nyuaka sitipikit tamat belajar tanda poco-poco ngagai sekeda raban KRIS ti udah mujur nembuka pelajar sida. Sebedau diberi sitipikit, semua sida ke tamat dulu dipinta madangka pengelandik diri ba tugung bala mayuh ke sama bisi dia. Kelimpah ari nya, raban sida tu mega lalu dipinta mantaika pengelandik diri dalam raban. Sitipikit tamat tu disuaka Y.Bhg Datu Michael Dawi Alli ke lalu nyadi Penyanding Penemu KRIS.
Nambahka pengerami nya, dia komiti mega bisi ngatur sukaneka ngagai bala ke bisi datai. Sekeda ari pekit ti bisi diatur nya pekit nama ke ubung ke dalam jerumat, pekit ngupak lalu makai telu, pekit ngupak lalu makai jeli enggau sekeda agi pekit renchit ti bukai. Mr. Patrick Chaong nyuaka perais ngagai pemenang.
Komiti mega bisi nyendiaka aktiviti enchabut tiket benasit. Laban hamper ti ditagaka chukup manah nya alai bala ke bisi datai sigi atam sereta enda nginsit nganti maya ti enchabut tiket benasit nya. Taja pia, semina enam iku aja sida iya ke betul-betul bisi nasit lalu semua sida iya ke bukai nya semina buya mimpi asa aja laban ti bedau mujur. TR. Sylverster Rangga nyuaka hamper ngagai Mr. &Mrs. Kubu Jenggi ke benasit.
Nyerumba pengerami tu kemari, bala KRIS chukup benasit mega laban siku penanyi ke benung angkat dama dalam industri muzik sempat limpang ngandak pengerami nya. Nyadi bala KRIS laban ke sigi enda ulung lalu enda mega jugau lalu minta Mr. Isa Lee mantaika patah nyawa iya mai lagu Tubai Pengerindu ba mua penulis lirik lagu tu empu. Bala KRIS chukup teperindang laban kelimpah ari lagu nya, bala mayuh mega bisi diperindang bala bukai ke sama bisi penau enggau pengelandik belagu seraya ngumpan sida ke galak bepoco-poco mantaika skil tauka pengelandik diri nge- lingutka punggung sambil muka langkah bepoco-poco. Sesekali, pengerami sida iya sebuat bisi diselat enggau pengawa ti alai mandangka pengelandik ngajat mega.
Sekeda agi bala sida ke indu ke rindu bemain ba ai sempat limpang mansai kibung ba sungai. Laban ai sungai nya buya bisi kembai lalu deras, ketegal hari ti bisi ujan ba lemai ti dulu, dia sida iya sebuat pulai puang, pulai pungkang tang udah chukup puas ati laban udah ulih muai gian ba pengawa ti kelalu lama udah enda dikereja sekumbang ke udah pulai ke mengeri.
Mantang jam pukul 4.30 lemai, Mr. Harold Unsie, Mandal Tuai Rumah ke lalu nyadi Malin Pengerami sida sehari nya lalu ngerah semua kaban KRIS bekemas pulai. Udah tembu besikap sereta bekemas, Hari Gempuru Diri Sebilik KRIS 2018 tembu urung pukul 5.00 lemai. Bala sida iya sebuat berasai lesa nyingkang pulai laban ti diperekuh pengelelak. Taja pia, sida iya seranyat bekejang pulai mai semua pengingat enggau kenang manis maya ke berami sehari-hari nya lalu nengelamka semua pengelelak diri.