Isu tu patut mungkur semua pengari penyakal enggau GPS, diatu ukai maya besalah pangan diri
SIBU: Parti Tindakan Demokratik ( DAP) Sibu minta aum ngenyit diatur dikena berandauka chara mutar kerekai igi penyakit rabies di nengeri tu.
Kaban Kunsil Nengeri (ADUN) Bukit Assek Irene Chang madah, isu tu patut mungkur semua pengari penyakal enggau Gempung Parti Sarawak (GPS) diiring Kepala Menteri Datuk Patinggi Abang Johari Tun Openg.
Irene madah, iya enggau ADUN Pelawan David Wong deka nganjung petisyen begulai ngagai Abang Johari dikena minta saut ari iya ngatur aum ngenyit.
“Kerekai igi penyakit bies majak balat lalu diatu ukai maya besalah pangan diri.
“Kededua piak patut begulai enggau semua sektor nyengkaum ketuai raban bansa ngiga chara ngelaban kerekai penyakit nya,” ku iya ba aum pemberita ditu, ensana.
Komiti Pengatur Penusah Ngenyit Nengeri udah ngenuku lima sitak baru kena keruga rabies ngujungka semua iya bisi 41 sitak positif rabies naka diatu. Sitak ke baru nya nyengkaum Jalai Teng Chin Hua di Sibu, Jalai Kilang ( Bintangor), Meradong, Sarikei, Jalai Padang Bilun Lama (Kapit), Piasau Jaya enggau Lutong Shell, Miri.
Irene madah, statistik tu mandangka pengerekai penyakit nya majak niki lalu chara mutar patut dipejalaika lengkas.
“Taja udah bisi pengawa dipejalai Komiti Pengatur Penusah Ngenyit Nengeri, tang nya agi bedau chukup nagang pengerembai penyakit nya ngagai 41 sitak dalam timpuh 15 bulan, iya nya purata 2.7 sitak baru sebulan,” ku iya.
Kes keterubah diripot nyadi kena 4 Julai taun nyin kemari.
Berebak enggau nya, Kaban Parlimen Sibu Oscar Ling deka meda Opis Mengeri Sibu (MPS) ‘gawa bebendar agi’ nangkap jelu lelang.
“Bisi siti kes ba Sibu. Pansik makmal benung digaga nengah sekeda sampel. Kitai ngarapka semua nya ulih tagang,” ku iya maya ngulu aum pemberita nya.
Kededua piak patut begulai enggau semua sektor nyengkaum ketuai raban bansa ngiga chara ngelaban kerekai penyakit nya. Irene Chang ADUN Bukit Assek