Literasi pemadah ditegapka nengah ‘Projek Reading Seeds’
KUCHING: Literasi pemadah ba renggat tumu anak mit lebih agi ba menua pesisir di nengeri tu ditegapka nengah ‘Projek Reading Seeds.’
Kenu ku Menteri Pengintu Pengelantang Pendiau, Komuniti, Pemansang Orang Indu, Ruang Bilik enggau Anak Mit Dato Sri Fatimah Abdullah, projek tu deka sambung ari ‘Projek Born to Read’ ke diatur Librari Nengeri Sarawak kenyau 2003.
“‘Projek Reading Seeds’ tu betuju ngelakuka literasi pemadah ba renggat timu pengidup anak mit lebih agi sida ke diau ba menua pesisir di nengeri t u,” ku iya nengah sebengkah penerang kemari.
Beduduk ari nya, Fatimah madag pengawa nyuaka kit ‘reading seeds’ deka diatur ba Dewan Masyarakat Dalat pagila nengah kerejasama Kaunsil Pelilih Dalat.
Iya madah, kenu ku Akademi Pediatrik Amerika Syarikat, anak mit ke diajar macha tumu, deka jampat agi teulihka penyulut ba sekula dibanding enggau anak mit ke nadai diajar macha tauka sebarang ngelala bup maya umur agi biak.
“Macha, nyepil, belagu enggau berandau kenyau ari mit deka bisi kaul enggau literasi enggau pengerembai jaku ke endang pugu pelajar
( www. healthychildren. org).
“Projek tu endang kerejasama entara Librari Nengeri Sarawak, Opis Menteri Pengintu Pengelantang Pendiau, Komuniti, Pemansang Orang Indu, Ruang Bilik enggau Anak Mit, Opis Pengerai Nengeri Sarawak enggau Opis Menteri Pengerai Malaysia,” ku iya.
Ku iya, nengah projek tu anak mit ke ada ba sepital perintah enggau Klinik Pengerai Perintah ba Sarawak deka diberi kit ‘ reading seeds.’
Iya madah, kit nya ngundan Bup Chara Ngajar Anak Mit ba Rumah dichelak Opis Menteri Pengintu Pengelantang Pendiau, Komuniti, Orang Indu, Ruang Bilik enggau Anak Mit Sarawak, empat bup nya bela bisi dua dala, jaku English enggau Jaku Malaysia, siti agi bup ngira enggau siti bup abjad, ‘Baby Developmental Milestone Guide Poster.’
“Nengah pejalai projek tu ulih mantu ngelakuka literasi pemadah ba renggat tumu.
“Program tu mega dikearap ulih mantu apai indai meri sukung bekaul pemansang anak mit,” ku iya.