Urung 30,000 ngerichah Pesta Tasik Biru 2018
BAU: Pesta Tasik Biru diatur 28 nyentuk 30 September ba Tebing Tasik Biru.
Urung 30,000 temuai ari Bau, Kuching, Kota Samarahan sereta Serian dipelaba deka nedat pasar Bau ke berengkah kemari nyentuk pagila.
Pemesai Pelilih Bau, Anelia Siam madah, Pesta Tasik Biru betuju dikena ngelakuka industri dagang temuai, ngangkatka main asal, meransang penatai raban orang dagang ke tau ngubah runding peranak menua pesisir.
Kenu ku iya, mayuh bengkah aktiviti manah diatur dikena ngerichahka pengerami tu nyengkaum eksibisyen, Bau Kitchen, panggau pemerindang, bemacham pekit, kus enggau mayuh agi ke bukai.
Nangkan nya, bisi mega pesereta deka ngambi bagi ba Pekit Regata Jong ke mungkur enam kategori beraban, jong pemadu manah enggau mayuh agi ke bukai.
“Mua ke malam 29 Septem- ber bisi diatur Ratu Tasik Biru enggau Mr Tasik Biru (pekit gumpal isi) nyadi pekit besai pengerami.
“Udah nya, ba hari ketiga tauka kepenudi, bisi diatur pekit jong pemadu manah, pengawa begelumur raban pemenggi motosikal kuasa besai, eksibisyen auto, pekit nyumpit, sereta pekit mandangka video.
Ku iya, Pesta Tasik Biru disadang ulih matak penatai temuai ari dalam menua enggau menua luar ngagai Pelilih Bau.
Menteri Dagang Temuai, Seni, Main Asal enggau Lumba Datuk Abdul Karim Rahman Hamzah
deka bejadika pengerami tu.
Pengawa nutup pengerami tu deka dipenyadika Menteri Muda Perengka Pengangkut ke mega Kaban Kunsil Nengeri (ADUN) Mambong Datuk Dr Jerip Susil sereta digulu ba pengari rayat ke bukai.