Apai indai diperansang nyaup bala pengajar nyeridi anak ngambi nyadi modal mensia ti nyulut ba semua pekara
ENGKILILI: Bala pengajar enggau apai indai patut besaup gawa sereta enda ngelempaika tanggungpengawa nyeridi ba bahu sekeda raban nempa modal mensia ti nyulut, ukai semina ari sukut akademik enggau kokurikulum aja, tang mega ulah nembiak.
Berindik ari nya, apai indai dilalau anang betegalka pengiruh diri gawa tauka jauh ari sekula ngasuh sida enda ibuhka tikas dijapai bala anak ba pelajar.
“Anang nejuka bala pengajar kediri aja ngajar bala anak laban tu udah nyadi pangku pengawa begulai, mansang tauka enda pengulih sida asil ari saup pengawa kededua raban,” pia ku Dr Rayong.
Kaban Kunsil Nengeri (ADUN) Engkilili Dr Johnical Rayong Ngipa mansutka jaku nya rambau Program Merarau SK Sedarat ba Balai Mit Komuniti Engkilili, pasar Engkilili ditu, kemari. Sama bisi datai Pemesai Pelajar Pelilih Lubok Antu, Vevein Mujah.
Ku iya, dikena nyapai juluk nya, bala pengajar patut nunda chara ngajar moden lalu ukai semina dalam kelas aja, tang ngaul pengawa ngajar luar kelas.
“Tu dikena nambahka chara ngajar meruan agi sereya ngemeratka pengerembai pengulih nembiak mungkur semua pekara,” ku iya.
Ngelansa silik, Dr Rayong dekaka sistem pelajar kemaya hari mega berundingka peminta nguasa pengelandik baka bekunsika teknologi pemadah, nguasa lebih siri ari bansa jaku kelebih agi Jaku English sereta bisi penau berunding chara analitikal, kritikal enggau kreatif.
“Tu deka nempa bala nembiak dudi hari ukai semina nangkup standard ti ditetap opis menteri pelajar nengeri tang mega nempa nembiak diperebut makit kereja dalam enggau luar menua,” ku iya madah nyemetak.
Ku iya, bala nembiak ti lemi ba pelajar patut diperansang sereta diberi lalau tama sekula vokasional ngambika nempa pengelandik nitihka pekara dikerindu enggau penau sida.
“Enti kitai rindu betukang, bisi pengelandik ngaga kek, bisi penau ba seni ngantaka pemajik dalam enggau luar sereta ke bukai, bala nembiak nya patut diembing nitihka pekara dikerindu sida empu, lalu dikena nyeliahka sida tinggal ba pelajar maya umur agi biak,” ku iya.
Ngelansa pasal sekula repok ba DUN Engkilili, iya deka ngemai isu nya ngagai Opis Menteri Pelajar, Sains enggau Pansik Teknologi di baruh Dato Sri Michael Manyin Jaong ngambika belanja ulih diagih ungkup pengawa nyeleti sekula re- pok nya.
“Aku mereti amat enti kitai deka nempa nembiak nyulut ba pelajar, kokurikulum enggau ulah. sekula patut nyendiaka rampa belajar ti meruan, lantang ngambika ulih belajar enggau meruan, disikap ngena perengka guna nyengkaum buding enggau rumah pengajar ti lantang endur diau,” ku iya.
Ngelansa silik, Dr Rayong dekaka Opis Menteri Pelajar Malaysia enda ngelaung lalu deka ngemeratka pekara sekula repok ba Sarawak nyengkaum nyendiaka agih belanja chukup dikena nyeleti sekula repok ba Sarawak.
“Aku balat siruka is utu laban baka ni kitai deka nempa nembiak pintar, bisi juluk enggau nangkup ‘value system’ enti penyikap perengka guna sekula repok?,” ku iya seraya nambah DUN Engkilili bisi 18 buah sekula lalu tebal agi ba kandang menua pesisir sereta repok ukai semina ba kelas aja, tang makmal, buding, rumah pengajar mega repok sereta suntuk kereban dikena ngajar.
Dulu ari nya, iya mega bisi nyuaka pemeri insentif ngagai nembiak nyulut peresa Ujian Penilaian Sekolah Rendah (UPSR) 2017.
Berebak enggau nya, Dr Rayong mega ngemendarka pengawa ngaga balai tebuka ungkup SK Sedarat beungkus RM50,000 ti digaga nengah RTP iya ungkup taun 2019. Seraya Serakup Apai Indai enggau Pengajar ( PIBG) nerima RM7,000 dikena melanja pejalai aktiviti sida.
Sama bisi datai Kepala Pengajar, Lewis Nyamon, Chairman YDB Dabong Bauk, Sapit YDP Donny Bagor, bala kaunsilor, pengajar, apai indai sereta bala bukai.