Pemujur ba pekit pidato nyungkak motivasyen, penyiru ke jaku Iban
KUCHING: Nyikap diri enggau penemu ba sentang topik ti disaraka iya nya “Pengangkun Ngetanka Leka Main Asal Iban Ulih Nyungkak Pengelati Jaku Iban” ngangkatka Brolin Golayous ,21, bulih gelar champion.
Bepekit ba kategori baruh 35 taun ba Pekit Pidato Jaku Iban Utusan Borneo (UB) 2018, iya madah pemujur nya nyungkak motivasyen diri ngambika ransing agi ngetanka jaku tangkai mengandai sereta bekenaka jaku Iban lebuh ti bejaku.
“Kelimpah ari nya, aku nyikap diri enggau penemu senentang leka main baka belajarka bansa leka main Iban enggau chara nyadaka sekeda leka main baka Tuk Tungguk, Indung- indung enggau Dit Dinai.
“Aku mega ngulihka infomasyen sentang chara ngayanka pengangkun ati ke leka main, lalu baka ni pengangkun nya ulih nyungkak pengelati jaku nengah kereban sanding baka bup enggau internet,’ku iya.
Nambahka nya ku nembiak Palan Pematih Pengajar(IPG) Kampus Rajang nya, iya sigi bisi peneleba bejaku ba mua bala mayuh alai maya umur 10 taun udah enggau orang ba pekit becherita.
Manggai umur 14 nyentuk ngagai 17 taun ku iya, aku nyereta pekit pidato jaku English ba Pelilih Betong.
“Nya alai aku endang di- tarak bala pengajar enggau penemu bepidato tauka bejaku ba mua mayuh kenyau ari sekula.
“Aku sigi rindu bepidato kelebih agi ba pekit pidato jaku Iban laban aku rindu mantaika jaku tulin Iban enggau leka main ba mua orang mayuh,”ku Brolin.
Ba siri keterubah pekit ke diatur ba taun 2017, Brolin bulih penuduk lumur dua alai maya nya iya bepekit ba kategori universiti.
Berindik enggau nya, iya madah pekit tu endang patut diatur lalu enti ulih diatur ninting taun laban tu siti ari chara ke ulih nerenakka pengerindu ke jaku Iban ba nembiak rebak baru.
Sadang penemu aku mega, aku ngarapka mayuh agi pekit ti bekaul enggau daya idup kitai Iban baka pekit leka main ulih diatur dudi hari ila, tandun Broli ke asal ari Kaki Wong Padeh, Betong.