Pekit Pidato tau ngelatika jaku bansa Iban, ku Jasmin
KUCHING: Pemenang lumur dua kategori tebuka Pekit Pidato Jaku Iban Utusan Borneo(UB) 2018 Jasmin Lyn Jap pechaya pekit ke diatur nya siti chara ke tau ngelatika jaku bansa Iban.
Pekara nya ku iya ngipakka enggau topik ‘Jaku Lati, Bansa Pegari: Sapa Bempu Tanggungpengawa Ngelatika Jaku Iban’, ke diungkup ngagai kategori tebuka pekit.
Berindik enggau nya, pelajar pom 6 SMK Engkelili nya ngarap pekit ulih diatur ba taun ti deka datai.
Jasmin ba siri keterubah pekit ba taun 2017, bela bulih penuduk lumur dua alai rambau nya iya bepekit ba kategori nembiak sekula.
“Berasai temegah bulih lumur dua lalu meri pengaga ngagai diri empu, diri sebilik enggau SMK Engkilili.
Asil embing bala pengajar lalu ditambah enggau pengerindu ba pidato ku iya, pemujur bulih lumur dua ungkup dua taun bejurut patut dikemegah.
SMK Engkilili ba pekit serak tu patut dikemegah, siku agi pemekit ari sekula nya, Tracy Layau William bulih penuduk lumur dua ba kategori baruh 35 taun.
Ba siri keterubah ba taun 2017, Tracy bulih gelar champian ba kategori baruh 17 taun.
Ngembuan pengerindu bejaku ba mua bala mayuh, nembiak pom 6 nya nerima peransang ari apai indai, pengajar enggau kaban bukai.
“Pekit pidato jaku Iban tu endang manah amat diatur dikena nyungkak pengelati jaku Iban kitai kelebih agi ba raban nembiak baru.
“Aku ngarap pekit tu diatur ninting taun,”ku iya ke asal ari Marup Runjing, Engkilili.
Tracy ba pengawa pidato kala bulih gelar pemekit pemadu manah ba ‘Bahas Ala Parlimen’ taun 2015.
Ba taun 2016, iya ngarika SMK Engkilili ba ‘ Bahas’ Piala Kepala Menteri Renggat Negeri Sarawak.